សម្ដេចតេជោ ហ៊ុនសែនចាត់ទុកពាក្យស្លោករបស់សម្ដេចធិបតីមួយឃ្លាថា<បរាជ័យនៅក្នុងសាលាប្រសើរជាងបរាជ័យនៅក្នុងជីវិត>ជាពាក្យស្លោកដែលមានតម្លៃមិនសាបសូន្យ

សម្ដេចតេជោ ហ៊ុន សែន បានថ្លែងថា៖ «ថ្ងៃនេះបានស្តាប់នាយករដ្ឋមន្ត្រីនិយាយពាក្យមួយឃ្លាថា(បរាជ័យនៅក្នុងសាលាប្រសើរជាងបរាជ័យនៅក្នុងជីវិត)ដែលសំដៅទៅលើការខិតខំរៀនសូត្ររបស់សិស្ស- និស្សិត។ សម្រាប់ខ្ញុំយល់ថាពាក្យមួយឃ្លានេះមិនគ្រាន់តែជាពាក្យនិយាយឲ្យរួចពីមាត់នោះទេតែជាពាក្យណែនាំតម្រង់ទិសដល់សិស្ស-និស្សិតគ្រប់ពេល។ ទោះបីខ្ញុំឆ្លងកាត់ធ្វើនយោបាយរយៈពេលវែងតែពាក្យមួយឃ្លានេះខ្ញុំចាត់ទុកថាជាពាក្យស្លោកដែលមានតម្លៃមិនសាបសូន្យ(បរាជ័យក្នុងសាលាប្រសើរជាងបរាជ័យក្នុងជីវិត)។» ការចាត់ទុកជាពាក្យស្លោក ដែលមានតម្លៃមិនសាបសូន្យពីសម្ដេចតេជោបែបនេះ បន្ទាប់ពីការថ្លែងរបស់នាយករដ្ឋមន្ត្រី ហ៊ុន ម៉ាណែត ក្នុងឱកាស អញ្ជើញជាអធិបតីពិធីប្រគល់សញ្ញាបត្រដល់និស្សិតសាកលវិទ្យាល័យអាស៊ី អឺរ៉ុប ២ ៥៧៣អង្គ/នាក់ នៅថ្ងៃទី២ ខែតុលា ឆ្នាំ២០២៦នេះ  រៀបចំឡើងនៅមជ្ឈមណ្ឌលសន្និបាត និងពិព័រណ៍កោះពេជ្រ ។ ដោយ៖ សុភ័ក្រ្ត