កាលពីថ្ងៃទី២៧ ខែតុលា ឆ្នាំ២០២៦ ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានទទួលជួបពិភាក្សាការងារ ជាមួយលោកស្រីបណ្ឌិត Than Thi Ha នាយិកាស្តីទីនៃអង្គការទស្សនៈពិភពលោក (World Vision) ប្រចាំកម្ពុជា នៅទីស្ដីការក្រសួង។
ភាគីទាំងពីរប្ដេជ្ញាពង្រឹងកិច្ចសហប្រតិបត្តិការក្នុងការពង្រីកសេវាទឹកស្អាត លើកកម្ពស់និរន្តរភាពនៃប្រព័ន្ធផ្គត់ផ្គង់ទឹកស្អាតសហគមន៍ និងគាំទ្រគ្រួសារងាយរងហានិភ័យ។
ជាមួយគ្នានោះ ឯកឧត្តមរដ្ឋមន្ត្រី បានលើកទឹកចិត្តឱ្យអង្គការ World Vision តម្រង់ទិសអន្តរាគមន៍របស់ខ្លួនក្នុងវិស័យទឹកស្អាតនាពេលអនាគត ឱ្យស្របតាមអាទិភាពអភិវឌ្ឍន៍រយៈពេលវែងរបស់កម្ពុជា ជាពិសេសការផ្លាស់ប្តូរពីប្រព័ន្ធផ្គត់ផ្គង់ទឹកស្អាតខ្នាតតូចតាមសហគមន៍ ទៅរកសេវាផ្គត់ផ្គង់ទឹកស្អាតតាមបណ្តាញ ដែលគ្រប់គ្រងដោយប្រតិបត្តិករអាជីព៕ ដោយ៖ ស្រីពី
