ភ្នាក់ងារស៊ើបអង្កេតសហព័ន្ធអាមេរិក (FBI) បានចាប់ខ្លួនបុរសម្នាក់នៅក្នុងទីក្រុង Oklahoma ក្រោមបទចោទប្រកាន់ថាជាអ្នកផ្ញើសំបុត្ររាប់រយច្បាប់ ដែលមានផ្ទុកម្សៅពណ៌សគួរឲ្យសង្ស័យ ទៅកាន់មន្ត្រីសាធារណៈនៅទូទាំងប្រទេស អំឡុងរដូវកាលបោះឆ្នោតឆ្នាំ ២០២៤ និង ២០២៦ នេះបើយោងតាមការចុះផ្សាយរបស់បណ្តាញព័ត៌មាន Fox News។
សំបុត្រសង្ស័យទាំងនោះត្រូវបានផ្ញើទៅកាន់ទីតាំងជាង ១០០ កន្លែង រួមទាំងការិយាល័យរដ្ឋលេខាធិការ និងការិយាល័យរៀបចំការបោះឆ្នោតជាច្រើនកន្លែង មុនពេលការបោះឆ្នោតពាក់កណ្តាលអាណត្តិឆ្នាំ ២០២៦ ចូលមកដល់។
យ៉ាងណាមិញ ផ្អែកលើការធ្វើតេស្តរហូតមកទល់ពេលនេះ មិនទាន់រកឃើញសារធាតុគ្រោះថ្នាក់ណាមួយនៅក្នុងម្សៅទាំងនោះនៅឡើយ ខណៈដែលកន្លងមក អាជ្ញាធរបានព្រមានដល់អ្នកទទួលសំបុត្រទាំងអស់ ឲ្យប្រុងប្រយ័ត្ន ចំពោះម្សៅសដូចគ្នានេះ ដែលអាចជា «សារធាតុបង្កគ្រោះថ្នាក់» យ៉ាងខ្លាំង។
ការិយាល័យរៀបចំការបោះឆ្នោតយ៉ាងហោចណាស់នៅក្នុងរដ្ឋចំនួន ១៥ បានរាយការណ៍ពីការទទួល ឬក្លាយជាគោលដៅនៃសំបុត្រសង្ស័យ ហើយសំបុត្រជាង ១០០ ច្បាប់ដែលសង្ស័យថាមានផ្ទុកម្សៅពណ៌សនេះ ត្រូវបានគេជឿជាក់ថាកំពុងចរាចរនៅក្នុងប្រព័ន្ធប្រៃសណីយ៍អាមេរិក៕ អត្ថបទ៖ រិទ្ធី
