កិច្ចសហប្រតិបត្តិការវប្បធម៌ភាពយន្តចិន-កម្ពុជា បានបោះជំហានសំខាន់មួយទៀត។ ថ្មីៗនេះ នៅក្នុង «វេទិកាស្ដារភាពយន្ត៖ គោរពដល់ស្នាដៃបុរាណដ៏ល្បីល្បាញ» ដែលធ្វើឡើងនៅទីក្រុងស៊ូចូវ ខេត្តជាំងស៊ូ ប្រទេសចិន បណ្ណសារភាពយន្តចិន និងនាយកដ្ឋានភាពយន្ត និងផ្សព្វផ្សាយវប្បធម៌ នៃក្រសួងវប្បធម៌ និងវិចិត្រសិល្បៈកម្ពុជា បានចុះហត្ថលេខាជាផ្លូវការលើ «អនុស្សរណៈយោគយល់គ្នាស្ដីពីកិច្ចសហប្រតិបត្តិការស្ដារភាពយន្តឆ្នាំ២០២៦–២០២៩»។ ភាគីទាំងពីរនឹងអនុវត្តកិច្ចសហប្រតិបត្តិការស្ដារភាពយន្តរយៈពេល៣ឆ្នាំ។
យោងតាមកិច្ចព្រមព្រៀង ភាគីទាំងពីរនឹងពង្រឹងកិច្ចសហប្រតិបត្តិការលើការស្ដារបណ្ណសារភាពយន្ត ការផ្លាស់ប្ដូរបច្ចេកទេស ការបណ្ដុះបណ្ដាលអ្នកជំនាញ និងការរៀបចំកម្មវិធីតាំងបង្ហាញរួម ដើម្បីការពារ និងផ្សព្វផ្សាយឯកសាររូបភាពភាពយន្តដ៏មានតម្លៃ។
សម្រាប់កម្ពុជា កិច្ចសហប្រតិបត្តិការនេះមានសារៈសំខាន់ណាស់។ ភាពយន្តចាស់ៗជាច្រើនបានកត់ត្រាប្រវត្តិសាស្ត្រ ជីវភាពសង្គម និងការអភិវឌ្ឍវប្បធម៌របស់ប្រទេស ប៉ុន្តែយូរទៅ ខ្សែភាពយន្តមួយចំនួនអាចរសាត់ពណ៌ ឬខូចខាត។ តាមរយៈបច្ចេកវិទ្យាស្ដារឌីជីថល រូបភាពដ៏មានតម្លៃទាំងនេះមានសង្ឃឹមថានឹងត្រូវរក្សាទុកបានកាន់តែល្អ និងបង្ហាញជូនទស្សនិកជនម្ដងទៀត។
បច្ចេកវិទ្យាស្ដារភាពយន្តរបស់ចិនក៏ផ្ដល់បទពិសោធន៍សម្រាប់កិច្ចសហប្រតិបត្តិការនេះដែរ។ គិតមកដល់បច្ចុប្បន្ន បណ្ណសារភាពយន្តចិនបានស្ដារភាពយន្តកម្រិតច្បាស់ខ្ពស់ចំនួន២៥៨៩រឿង ភាពយន្តកម្រិត2K ចំនួន៥០២រឿង និងភាពយន្តកម្រិត4K ចំនួន៨១រឿង។
តាមពិត ភាគីចិន និងកម្ពុជា ធ្លាប់បានផ្លាស់ប្ដូរបច្ចេកទេសស្ដារភាពយន្តចាស់ៗនៅទីក្រុងហ្វូចូវរួចមកហើយ ដែលជាមូលដ្ឋានសម្រាប់កិច្ចសហប្រតិបត្តិការលើកនេះ។
ចាប់ពីការចាក់បញ្ចាំងភាពយន្ត ទៅកិច្ចសហប្រតិបត្តិការបច្ចេកទេស និងការបណ្ដុះបណ្ដាលអ្នកជំនាញ ភាគីទាំងពីរកំពុងបន្តពង្រីកជម្រៅនៃការផ្លាស់ប្ដូរវប្បធម៌ភាពយន្ត។ ការចុះហត្ថលេខាលើកនេះក៏បង្កើតឱកាសថ្មីសម្រាប់កម្ពុជា ក្នុងការការពារបេតិកភណ្ឌវប្បធម៌ភាពយន្ត បណ្ដុះបណ្ដាលអ្នកជំនាញភាពយន្ត និងទូរទស្សន៍ និងជំរុញឱ្យភាពយន្តបុរាណដ៏ល្បីល្បាញឈានទៅកាន់ឆាកអន្តរជាតិ។
