ក្រសួងការពារជាតិ៖ ក្រុមអ្នកសង្កេតការណ៍អាស៊ានមកពិនិត្យស្ថានភាពជនរងរបួសពីការបាញ់ប្រហាររបស់យោធាថៃ នៅបន្ទាយមានជ័យ

ភ្នំពេញ៖ លោកជំទាវ ឧត្តមសេនីយ៍ឯក ម៉ាលី សុជាតា អ្នកនាំពាក្យក្រសួងការពារជាតិ នៃព្រះរាជាណាចក្រកម្ពុជា បានជម្រាបជូនសាធារណជន និងអ្នកសារព័ត៌មានជាតិ និងអន្តរជាតិឲ្យបានជ្រាបថា នៅព្រឹកថ្ងៃព្រហស្បតិ៍ ទី១៣ ខែវិច្ឆិកា ឆ្នាំ២០២៥ ម៉ោង ០៧:៥៨នាទី ក្រុមការងារសម្របសម្រួលអ្នកសង្កេតការណ៍របស់ក្រសួងការពារជាតិ បានអញ្ជើញក្រុមអ្នកសង្កេតការណ៍អាស៊ាន (AOT) មកដល់មន្ទីរពេទ្យកម្ពុជា–ជប៉ុន មង្គលបុរី ដើម្បីពិនិត្យសុខភាព និងស្ថានភាពជនស៊ីវិលកម្ពុជាដែលរងរបួសពីការបាញ់ប្រហាររបស់យោធាថៃ កាលពីថ្ងៃទី១២ ខែវិច្ឆិកា ឆ្នាំ២០២៥ នៅភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ។

គួររំលឹកថា កាលពីថ្ងៃទី១២ ខែវិច្ឆិកា ឆ្នាំ២០២៥ យោធាថៃបានបើកការបាញ់ប្រហារចំនួនពីរលើកចូលមកក្នុងទឹកដីកម្ពុជា ដែលលើកទីមួយបានកើតឡើងនៅម៉ោងប្រមាណ ១៥:៥០នាទី និងលើកទីពីរនៅម៉ោងប្រមាណ ១៧:៥៤នាទីល្ងាច។ ការបាញ់ប្រហារទាំងនេះ បានបណ្តាលឲ្យប្រជាជនស៊ីវិលកម្ពុជារងរបួសចំនួន ៣នាក់ និងស្លាប់ចំនួន ១នាក់។

ក្រសួងការពារជាតិបានបញ្ជាក់ថា ការសម្របសម្រួលនៃក្រុមអ្នកសង្កេតការណ៍អាស៊ាន ជាផ្នែកមួយនៃការបង្ហាញភាពត្រាស់ថ្លា និងការសហការជាបន្តរបស់កម្ពុជា ក្នុងការរក្សាសន្តិភាព តាមបណ្តោយតំបន់ព្រំដែន និងបង្ហាញការយកចិត្តទុកដាក់ចំពោះសិទ្ធិ និងសុវត្ថិភាពប្រជាពលរដ្ឋ។

ដោយ៖ ទូរទស្សន៍ខេត្តព្រះសីហនុ