នៅថ្ងៃទី២៤ ខែធ្នូ ខណៈអាស៊ានជំរុញកិច្ចចរចាឈប់បាញ់រវាងកម្ពុជា និងថៃ ស្ថានភាពសន្តិសុខតាមព្រំដែននៅតែតានតឹង។ កម្ពុជាបានថ្លែងថា យោធាថៃបង្កើនសកម្មភាពនៅតំបន់ព្រំដែនកម្ពុជា មុនកិច្ចចរចា ដោយបាញ់ផ្លោង និងវាយប្រហារតាមអាកាសលើតំបន់ប្រជាជនជាច្រើន បណ្តាលឱ្យពលរដ្ឋស្លាប់ របួស និងជម្លៀសខ្លួនយ៉ាងច្រើន។
ក្រសួងការពារជាតិកម្ពុជាបានជូនដំណឹងថា ចាប់តាំងពីខែធ្នូ កងទ័ពថៃបាញ់ផ្លោងជាច្រើនលើកលើតំបន់មានប្រជាជនច្រើន រួមមានក្រុងប៉ោយប៉ែត ខេត្តបន្ទាយមានជ័យ និងខេត្តព្រះវិហារ ហើយប្រើយន្តហោះ F-16 វាយប្រហារតាមអាកាស។ សកម្មភាពទាំងនេះបណ្តាលឱ្យពលរដ្ឋស្លាប់២១នាក់ របួស៨៣នាក់ និងប្រមាណ៥៥ម៉ឺននាក់បង្ខំចាកចេញពីផ្ទះ។ កម្ពុជាចាត់ទុកសកម្មភាពទាំងនេះថារំលោភធ្ងន់ធ្ងរលើគោលការណ៍ច្បាប់មនុស្សធម៌អន្តរជាតិ។
សេចក្តីជូនដំណឹងបន្ថែមថា ក្នុងមួយថ្ងៃចុងក្រោយ តំបន់លំនៅឋានជាច្រើននៅក្រុងប៉ោយប៉ែតរងការបាញ់ផ្លោងជាបន្តបន្ទាប់ ហើយខេត្តព្រះវិហារក៏រងការវាយប្រហារតាមអាកាស ដែលបំផ្លាញបន្ថែមដល់ហេដ្ឋារចនាសម្ព័ន្ធស៊ីវិល។ ចាប់ពីជម្លោះផ្ទុះឡើងថ្ងៃទី៧ ខែធ្នូ ផ្ទះ សាលារៀន មន្ទីរពេទ្យឬទីតាំងសុខាភិបាល សាសនដ្ឋាន និងអគាររដ្ឋាភិបាលជាង១០០ទីតាំង រងការខូចខាតកម្រិតផ្សេងៗ ខណៈស្ថានភាពមនុស្សធម៌តាមព្រំដែនកាន់តែអាក្រក់។
រាយការណ៍សរុបដោយស្ថានីយនេះ
