មន្ទីរបរិស្ថានខេត្តព្រះវិហារបានរាយការណ៍ថ្មីៗនេះថា បានរកឃើញដំរីអាស៊ីញីពេញវ័យមួយក្បាល និងកូនរបស់វាដែលរលូតស្លាប់ នៅចំណុច O’Skach ក្នុងដែនជម្រកសត្វព្រៃព្រះរការ–ឆែប។ ការស៊ើបអង្កេតបឋមបង្ហាញថា ហេតុការណ៍នេះពាក់ព័ន្ធនឹងអំបែងគ្រឿងផ្ទុះបន្សល់ពីជម្លោះយោធាជាមួយថៃ ដែលធ្វើឱ្យមេដំរីរងរបួស និងស្លាប់ក្នុងអូរ ហើយកូនដំរីក៏មិនអាចរស់បាន។
..
តាមមន្ត្រីឧទ្យានុរក្ស និងសហគមន៍មូលដ្ឋាន អ្នកភូមិបានឃើញដានជើងដំរីមានឈាមតាំងពីពាក់កណ្តាលខែធ្នូ ហើយបានរាយការណ៍ភ្លាមៗ។ បន្ទាប់មក មន្ទីរបរិស្ថានខេត្តបានរៀបចំឧទ្យានុរក្សដែនជម្រកសត្វព្រៃ រួមជាមួយអ្នកស្រាវជ្រាវសត្វព្រៃរបស់អង្គការ Wildlife Conservation Society (WCS) ធ្វើការស្វែងរក និងស៊ើបអង្កេតជាច្រើនលើក។ ប៉ុន្តែដោយព្រៃមានទំហំធំ និងនៅជិតតំបន់ជម្លោះ ការស្វែងរកត្រូវបានរឹតត្បិត ហើយទើបបញ្ជាក់ថាដំរីទាំងពីរស្លាប់នៅចុងខែធ្នូ។ អាជ្ញាធរកំពុងបន្តស៊ើបអង្កេត និងចាត់ចែងសាកសពដំរីតាមច្បាប់។
តាមព័ត៌មានផ្លូវការ ក្នុងខេត្តព្រះវិហារមានដំរីព្រៃប្រមាណ២០ក្បាល ដែលភាគច្រើនរស់នៅដែនជម្រកសត្វព្រៃព្រះរការ–ឆែប និងតភ្ជាប់នឹងប្រព័ន្ធអេកូឡូស៊ីភ្នំតាមព្រំដែនកម្ពុជា–ថៃ និងកម្ពុជា–ឡាវ។ ក្នុងរយៈពេល១០ឆ្នាំកន្លងមក មិនមានកំណត់ត្រាដំរីព្រៃស្លាប់នៅមូលដ្ឋានទេ។ ការសិក្សាថ្មីបង្ហាញថា ចំនួនដំរីព្រៃទូទាំងកម្ពុជាបានកើនដល់ជាង៦០០ក្បាល។ ដំរីអាស៊ីស្ថិតក្នុងចំណាត់ថ្នាក់ជិតផុតពូជនៃបញ្ជីក្រហម IUCN និងត្រូវបានការពារយ៉ាងតឹងរ៉ឹងក្រោមឧបសម្ព័ន្ធទី១ នៃអនុសញ្ញា CITES។
រាយការណ៍សរុបដោយស្ថានីយនេះ
