ក្លឹបកីឡាមហាមិត្ត រៀបចំបើកការប្រកួតបាល់ទាត់យុវជនអាយុក្រោម២៣ឆ្នាំ លើកទី១ ក្រោមប្រធានបទ«ក្តីស្រមៃ និងទេពកោសល្យនៃយុវជនខេត្តព្រះសីហនុ» នៅរសៀលថ្ងៃទី១៤ ខែកុម្ភៈ ឆ្នាំ២០២៦នេះ។ ពិធីបើកការប្រកួត បានធ្វើឡើងក្រោមវត្តមានលោក សាមុត សុធារិទ្ធ អភិបាលរងខេត្តព្រះសីហនុ និងមានការចូលរួមពីមន្រ្តីអ្នកមុខអ្នកការជាច្រើនរូប។
លោកអភិបាលរងខេត្ត បានបញ្ជាក់ថា រដ្ឋបាលខេត្តបានលើកទឹកចិត្ត និងផ្តល់ការឧបត្ថម្ភគាំទ្រគ្រប់រូបភាព ការសាងសង់ហេដ្ឋារចនាសម្ព័ន្ធរូបវន្តគាំទ្រការលេងកីឡា និងការបំពាក់ឧបករណ៍កីឡានៅតាមទីសាធារណៈ ដើម្បីបំផុសទឹកចិត្តប្រជាជនឱ្យយកចិត្តទុកដាក់ថែទាំសុខភាព។ ក្នុងន័យនេះ លោក ចង់បង្ហាញថា ការថែទាំសុខភាព គឺជាទ្រព្យសកម្មដ៏មានតម្លៃសម្រាប់មនុស្សគ្រប់រូប តាមរយៈការហាត់ប្រាណ និងលេងកីឡា ដោយមិនគិតក្មេង ចាស់ ភេទ ឋានៈតួនាទី ដើម្បីលើកកម្ពស់សុខភាពផ្លូវកាយ ផ្លូវចិត្ត បញ្ញា ស្មារតី ការពារជំងឺ ដូចជា ឆាប់ហត់ លើសឈាម ទឹកនោមផ្អែម ជំងឺរាំរ៉ៃមួយចំនួន និងកាត់បន្ថយការចំណាយលើសេវាសុខាភិបាលជួយលើកកម្ពស់សេដ្ឋកិច្ចគ្រួសារ សហគមន៍ សង្គមកម្ពុជាទាំងមូលប្រកបដោយសុខដុមនីយកម្ម។
អភិបាលរងខេត្ត សង្កត់ធ្ងន់ថា ការរៀបចំព្រឹត្តិការណ៍ប្រកួតកីឡានាពេលនេះ ជាការបំផុស និងជំរុញយុវជន សិស្សានុសិស្សចូលរួមសកម្មភាពកីឡាបាល់ទាត់ឱ្យបានកាន់តែច្រើន ក្នុងន័យអភិវឌ្ឍន៍ធនធានមនុស្សក្នុងខេត្តព្រះសីហនុ។
សូមជម្រាបថា ការប្រកួតបាល់ទាត់យុវជនអាយុក្រោម២៣ឆ្នាំ លើកទី១នេះ មានក្រុមបាល់ទាត់យុវជនចូលរួមសរុប ៧ក្រុម។ ក្នុងនោះរួមមាន៖ ក្រុមបាល់ទាត់ ប៊ល អេហ្វស៊ី ក្រុមបាល់ទាត់ពេទ្យ ក្រុមបាល់ទាត់ស៊ីង ស៊ីង ក្រុមបាល់ទាត់ មហាមិត្ត ក្រុមបាល់ទាត់ អ.ម.ត. ក្រុមបាល់ទាត់ ព្យុះ និងក្រុមបាល់ទាត់ហ្វក់ស៊ី៕
អត្ថបទ៖ ង៉ែត ពិសាន្ត
រូបភាព៖ ប៉ៃ សុឃីម
