ខេត្តព្រះសីហនុ៖ ដើម្បីលើកកម្ពស់សោភ័ណភាពបរិស្ថានស្អាតនៅបរិវេណរូបសំណាកព្រះថោងស្ថិតនៅក្នុងបិតត្រាំងក្រុងកំពង់សោម ក្នុងការទទួលភ្ញៀវទេសចរជាតិអន្តរជាតិមកលេងកំសាន្ត។
នៅថ្ងៃទី ១០ ខែមីនាឆ្នាំ ២០២៦ ឯកឧត្តម ម៉ាង ស៊ីណេត អភិបាលខេត្តព្រះសីហនុ និង លោកអភិបាលក្រុងកំពង់សោម បានចុះពិនិត្យមើលស្ថានភាពការរៀបចំជួសជុលកែលម្អ សួនច្បារនិងរូបសំណាកព្រះថោង ជាមួយគ្នានោះឯកឧត្តមអភិបាលខេត្តបានជំរុញឲ្យក្រុមជាងពន្លឿនក្នុងការជួសជុលព្រោះទីតាំងនេះជាកន្លែងពេញនិយមសម្រាប់ភ្ញៀវទេសចរទាំងជាតិនិងអន្តរជាតិមកថតរូបនិងទស្សនាកំសាន្តជារៀងរាល់ថ្ងៃ។
ហើយឯកឧត្តមអភិបាលខេត្ត ក៏បានណែនាំទៅដល់អ្នកលក់ដូរប្រកបអាជីវកម្មនៅបរិវេណសួនច្បាររង្វង់មូលព្រះថោង សូមចូលរួមថែរក្សាអនាម័យទុកដាក់សំរាមឲ្យបានត្រឹមត្រូវនិងជួយរើសសំរាមទាំងអស់គ្នា ដើម្បីឲ្យកន្លែងទេសចរវប្បធម៌របស់យើងមានសោភ័ណភាពនិងបរិស្ថានស្អាតក្នុងការទាក់ទាញភ្ញៀវទេសចរ៕ ដោយ៖ ប៉ៃ សុឃីម
