ភ្នំពេញ៖ កិច្ចសហប្រតិបត្តិការស្រាវជ្រាវវិស័យកសិកម្មរវាងប្រទេសកម្ពុជា និងអូស្ត្រាលី បានបន្តអភិវឌ្ឍយ៉ាងសកម្មអស់រយៈពេលជាង៣០ឆ្នាំ ដោយមានតួនាទីសំខាន់ក្នុងការលើកកម្ពស់ផលិតភាពកសិកម្ម និងជីវភាពរស់នៅរបស់ប្រជាកសិករកម្ពុជា។
កិច្ចសហការនេះ បានផ្តោតលើការធ្វើទំនើបកម្មវិស័យកសិកម្ម ការកសាងភាពធន់នឹងការប្រែប្រួលអាកាសធាតុ និងការពង្រឹងសន្តិសុខស្បៀង តាមរយៈការណែនាំបច្ចេកវិទ្យាទំនើប និងការស្រាវជ្រាវវិទ្យាសាស្ត្រកសិកម្មជាចម្បង។
សកម្មភាពសំខាន់ៗ រួមមានការប្រើប្រាស់បច្ចេកវិទ្យាឡាស៊ែរកៀរដី ដើម្បីបង្កើនប្រសិទ្ធភាពផលិតកម្មស្រូវ-អង្ករ កាត់បន្ថយការប្រើប្រាស់ទឹក និងបង្កើនទិន្នផលសម្រាប់កសិករខ្នាតតូច។ ជាមួយគ្នានេះ ការស្រាវជ្រាវពូជដំណាំ និងសត្វចិញ្ចឹមក៏ត្រូវបានអភិវឌ្ឍយ៉ាងទូលំទូលាយ ដូចជា ការគ្រប់គ្រងជំងឺដំឡូងមី និងការបង្កើតពូជមាន់ស្រែដែលមានភាពធន់នឹងបរិស្ថាន។
ជាពិសេស កិច្ចសហការនេះបានជួយបង្កើតពូជស្រូវថ្មី “ចំប៉ីស៧០” ដែលអភិវឌ្ឍពីពូជផ្ការំដួលដ៏ល្បីល្បាញរបស់កម្ពុជា ដោយមានទិន្នផលមធ្យមប្រមាណជាង៤តោនក្នុងមួយហិកតា ដែលបានចូលរួមយ៉ាងសំខាន់ក្នុងការកែលម្អប្រាក់ចំណូល និងជីវភាពរស់នៅរបស់កសិករ។
បន្ថែមពីនេះ កម្មវិធីអភិវឌ្ឍន៍បង្កាត់ពូជសត្វបែបសហគមន៍ ក៏ត្រូវបានដាក់អនុវត្ត ដើម្បីលើកកម្ពស់ការចិញ្ចឹមមាន់ស្រែឱ្យមានប្រសិទ្ធភាព និងសមស្របនឹងលក្ខខណ្ឌអាកាសធាតុក្នុងតំបន់។
គួរបញ្ជាក់ថា កិច្ចសហប្រតិបត្តិការនេះ គឺជាផ្នែកសំខាន់មួយនៃយុទ្ធសាស្ត្រអភិវឌ្ឍន៍កសិកម្មរបស់កម្ពុជា សម្រាប់អំឡុងឆ្នាំ២០២២-២០៣០ ដែលមានគោលបំណងជំរុញការប្រើប្រាស់បច្ចេកវិទ្យា និងការកែលម្អខ្សែសង្វាក់តម្លៃកសិកម្ម។
ក្នុងបរិបទនេះ លោកស្រី Fiona Simson ប្រធានគណៈកម្មការស្រាវជ្រាវកសិកម្មអន្តរជាតិរបស់អូស្ត្រាលី បានធ្វើទស្សនកិច្ចនៅកម្ពុជា និងបានជួបពិភាក្សាការងារជាមួយឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ដើម្បីពិនិត្យសមិទ្ធផលនានា និងស្វែងរកទិសដៅពង្រឹងកិច្ចសហការនាពេលអនាគត។
កិច្ចសហប្រតិបត្តិការយូរអង្វែងនេះ ត្រូវបានគេរំពឹងថា នឹងបន្តជួយជំរុញការអភិវឌ្ឍវិស័យកសិកម្មកម្ពុជាឱ្យកាន់តែប្រសើរ និងមានសមត្ថភាពប្រកួតប្រជែងលើទីផ្សារអន្តរជាតិ។
ដោយ៖ KPS99TV
