ថ្ងៃទី២៣ ខែមីនា៖ ក្រុមការងារអនុវត្តច្បាប់រួមខេត្តព្រះសីហនុបានរាយការណ៍ថា បានត្រួតពិនិត្យទីតាំងប្រមូលផ្ដុំស្នាក់នៅសង្ស័យ២៦កន្លែង និងចុះបង្ក្រាបទីតាំងសង្ស័យឆបោកតាមអនឡាញ៤កន្លែង ដោយឃាត់ខ្លួនជនសង្ស័យ៥០នាក់។
តាមសេចក្ដីរាយការណ៍ ទីតាំង៤នោះស្ថិតនៅសណ្ឋាគារមួយ តំបន់វីឡាមួយ អគារអាផាតមិនមួយ និងផ្ទះជួលមួយនៅសង្កាត់លេខ៤។ ជនសង្ស័យទាំង៥០នាក់មានសញ្ជាតិផ្សេងៗ រួមមានជនជាតិចិន៣៦នាក់ ខ្មែរ៣នាក់ ឥណ្ឌា៥នាក់ បង់ក្លាដែស៣នាក់ ប៉ាគីស្ថាន២នាក់ និងមីយ៉ាន់ម៉ា១នាក់។ សមត្ថកិច្ចដកហូតឧបករណ៍សង្ស័យប្រើប្រាស់ក្នុងបទល្មើស រួមមានកុំព្យូទ័រលើតុ ទូរស័ព្ទ និងកុំព្យូទ័រយួរដៃ។
ដោយឡែក សមត្ថកិច្ចក៏ត្រួតពិនិត្យកាស៊ីណូ Golden City នៅក្រុងព្រះសីហនុ និងរកឃើញឧបករណ៍សង្ស័យប្រើក្នុងការឆបោកតាមអនឡាញ រួមមានកុំព្យូទ័រលើតុ១៨៦គ្រឿង និងទូរស័ព្ទ១៥៤គ្រឿង។ អ្នកពាក់ព័ន្ធ និងវត្ថុតាងត្រូវបានប្រគល់ឱ្យនគរបាល ដើម្បីស៊ើបអង្កេតបន្ត និងស្វែងរកអ្នករៀបចំនៅពីក្រោយ។
