ថ្ងៃទី៣០ ខែមីនា ក្រសួងការបរទេស និងសហប្រតិបត្តិការអន្តរជាតិកម្ពុជា បានចេញសេចក្ដីថ្លែងការណ៍បដិសេធព័ត៌មានថា កម្ពុជាសុខចិត្តប្រគល់ទឹកដីជាថ្នូរឱ្យថៃបញ្ឈប់ការរំលោភ ប៉ុន្តែត្រូវបានបដិសេធ។ ក្រសួងបានចាត់ទុកការលើកឡើងនេះថាមិនពិត និងជាការបំភ្លៃដោយបុគ្គលប្រឆាំងខ្លះក្នុងគោលបំណងនយោបាយ។
សេចក្ដីថ្លែងការណ៍បានចោទលោក សម រង្ស៊ី និងលោក អ៊ុំ សំអាន ដែលរស់នៅក្រៅប្រទេស ព្រមទាំងសារព័ត៌មានក្រៅប្រទេសខ្លះថា បានកាត់យកសម្ដីឧបនាយករដ្ឋមន្ត្រី និងរដ្ឋមន្ត្រីការបរទេស ប្រាក់ សុខុន មកបកស្រាយខុសបរិបទ។ ក្រសួងថា ក្នុងជំនួបជាមួយប្រជាពលរដ្ឋភៀសខ្លួនតាមព្រំដែន នៅតំបន់ថ្មដា ខេត្តពោធិ៍សាត់ ថ្ងៃទី២៧ ខែមីនា លោកបានបញ្ជាក់ពីការដោះស្រាយបញ្ហាព្រំដែនដោយសន្តិវិធី ក្រោមក្របខ័ណ្ឌច្បាប់អន្តរជាតិ និងសន្ធិសញ្ញា យន្តការដែលមានស្រាប់។
ក្រសួងបានចាត់ទុកការអះអាងពីការដោះដូរទឹកដីនឹងសន្តិភាពថាជាការប្រឌិតដោយចេតនា ហើយថាព្រំដែនកម្ពុជា–ថៃផ្អែកលើអនុសញ្ញាឆ្នាំ១៩០៤ សន្ធិសញ្ញាឆ្នាំ១៩០៧ និងផែនទីប្រវត្តិសាស្ត្រ។ កម្ពុជាបញ្ជាក់ថា បើការបោះបង្គោលព្រំដែនរកឃើញភាគីណាកាន់កាប់ដីហួសខ្សែព្រំដែន ត្រូវប្រគល់ត្រឡប់តាមគោលការណ៍បដិការ និងដោះស្រាយដោយសន្តិវិធីនិងច្បាប់។ ទាំងនេះជាជំហររបស់ភាគីកម្ពុជា។
