នាយករដ្ឋមន្រ្តីកម្ពុជា សម្តេចធិបតី ហ៊ុន ម៉ាណែត បានបង្ហោះសារនៅលើទំព័រហ្វេសប៊ុកនាព្រឹកថ្ងៃទី៣១ ខែមីនាដោយណែនាំឱ្យគណ:បញ្ជាការឯកភាពរាជធានី-ខេត្ត ជាពិសេសសមត្ថកិច្ចពាក់ព័ន្ធទាំងអស់ត្រូវយកចិត្តទុកដាក់អនុវត្តបទបញ្ជារបស់រាជរដ្ឋាភិបាលឱ្យបានម៉ឺងម៉ាត់ក្នុងការពង្រឹងសុវត្ថិភាពចរាចរណ៍ផ្លូវគោក ក្នុងឱកាសដែលប្រជាជនខ្មែរនឹងត្រូវធ្វើដំណើរទៅស្រុកកំណើត ឬដំណើរកម្សាន្តពេលចូលឆ្នាំថ្មីប្រពៃណីជាតិខ្មែរ។
ការណែនាំរបស់សម្តេចធិបតី ធ្វើឡើងស្របពេលដែលពិធីបុណ្យចូលឆ្នាំថ្មីប្រពៃណីជាតិខ្មែរកាន់តែខិតជិតមកដល់ពោលគឺនៅថ្ងៃទី១៤ដល់ថ្ងៃទី១៦ ខែមេសាខាងមុខ។ ម្យ៉ាងវិញទៀត ការណែនាំដូច្នេះ ទំនងដោយសារតែសម្តេចសង្កេតឃើញគ្រោះថ្នាក់ចរាចរណ៍តែងកើតឡើងច្រើនក្នុងរយៈពេលកន្លងទៅនេះ និងដើម្បីការពារសុខសុវត្ថិភាពរបស់ប្រជាពលរដ្ឋក្នុងអំឡុងបុណ្យចូលឆ្នាំថ្មីផង។
សម្តេចធិបតីនាយករដ្ឋមន្រ្តី ក៏បានអំពាវនាវឱ្យប្រជាពលរដ្ឋបើកបរដោយប្រុងប្រយ័ត្នខ្ពស់ និងគោរពច្បាប់ចរាចរណ៍ឱ្យបានម៉ឺងម៉ាត់ ជាពិសេសក្នុងអំឡុងពេលបុណ្យចូលឆ្នាំប្រពៃណីជាតិខ្មែរនាពេលខាងមុខ។ សម្តេចក្រើនរំលឹកថា ចំពោះការបើកបរដោយមិនគោរពច្បាប់ជាពិសេសការបើកបរដោយស្ថិតក្រោមស្ថានភាពស្រវឹងដែលបានបង្កឱ្យមានគ្រោះថ្នាក់ដល់អាយុជីវិតអ្នកដទៃ និងត្រូវទទួលខុសត្រូវតាមច្បាប់យ៉ាងតឹងរឹងបំផុត ដោយគ្មានការលើកលែងឡើយ៕
ដោយ៖ ង៉ែត ពិសាន្ត
