កណ្ដាល៖ ឯកឧត្តម គួច ចំរើន អភិបាល នៃគណៈអភិបាលខេត្តកណ្ដាល បានណែនាំមន្ទីរ-អង្គភាពជុំវិញខេត្ត បន្តពង្រឹង និងលើកកម្ពស់តួនាទីភារកិច្ចរបស់ខ្លួន ក្នុងការផ្ដល់សេវាសាធារណៈជូនប្រជាពលរដ្ឋ ឱ្យកាន់តែមានប្រសិទ្ធភាព និងឆ្លើយតបតាមតម្រូវការជាក់ស្តែងនៅតាមមូលដ្ឋាន។
ការណែនាំនេះ ត្រូវបានធ្វើឡើងក្នុងឱកាសដែល ឯកឧត្តម អញ្ជើញជាអធិបតីរួមជាមួយ ឯកឧត្តម នូ សាខន ប្រធានក្រុមប្រឹក្សាខេត្តកណ្ដាល ក្នុងកិច្ចប្រជុំសាមញ្ញលើកទី២៣ របស់ក្រុមប្រឹក្សាខេត្ត អាណត្តិទី៤ នាថ្ងៃទី៨ ខែមេសា ឆ្នាំ២០២៦ ដោយមានការចូលរួមពីសមាជិកក្រុមប្រឹក្សាខេត្ត អភិបាលរងខេត្ត មន្ទីរ-អង្គភាពជុំវិញខេត្ត និងមន្ត្រីពាក់ព័ន្ធជាច្រើនរូប។
ក្នុងកិច្ចប្រជុំនេះ ឯកឧត្តម នូ សាខន ប្រធានក្រុមប្រឹក្សាខេត្តកណ្ដាល បានសម្តែងការកោតសរសើរចំពោះ គ.ក.ស.ក.ខេត្ត ដែលបានចូលរួមយ៉ាងសកម្មក្នុងការងារសេវាសង្គម និងបានគូសបញ្ជាក់ថា ការងារគាំពារសង្គម គឺជាការងារសំខាន់ដែលត្រូវការការសហការយ៉ាងជិតស្និទ្ធពីគ្រប់ភាគី។ ក្នុងន័យនេះ ឯកឧត្តមបានស្នើឱ្យមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្ត បន្តសហការជាមួយ គ.ក.ស.ក.ខេត្ត ឱ្យកាន់តែមានប្រសិទ្ធភាព។
ជាមួយគ្នានេះ ឯកឧត្តមប្រធាន បានថ្លែងអំណរគុណចំពោះ គ.ក.ស.ក.ខេត្ត ដែលបានសហការជាមួយអាជ្ញាធរ និងមន្ទីរ-អង្គភាពជំនាញ ចុះពិនិត្យ តាមដានស្ថានភាពជំងឺរមាស់ដែលកើតមាននៅភូមិអង្គរជ័យ ឃុំបន្ទាយដែក ស្រុកកៀនស្វាយ ព្រមទាំងបានចុះអនុវត្តការងារផ្ទាល់លើករណីផ្សេងៗ ដើម្បីវាយតម្លៃ និងដោះស្រាយបញ្ហាប្រឈមនានា ពាក់ព័ន្ធនឹងការលើកកម្ពស់សុខុមាលភាពស្ត្រី យុវវ័យ និងកុមារ។
ឯកឧត្តម គួច ចំរើន អភិបាល នៃគណៈអភិបាលខេត្តកណ្ដាល បានណែនាំឱ្យមន្ទីរ-អង្គភាពជុំវិញខេត្ត បន្តលើកកម្ពស់ប្រសិទ្ធភាពការងារ ក្នុងការផ្ដល់សេវាជូនប្រជាពលរដ្ឋ ឱ្យបានល្អប្រសើរ និងសមស្របតាមតម្រូវការចាំបាច់នៅតាមមូលដ្ឋាន។
ជាពិសេស ត្រូវបន្តសហការគ្នាដោះស្រាយសំណើ សំណូមពរ និងបញ្ហាប្រឈមនានារបស់ប្រជាពលរដ្ឋ ប្រកបដោយតម្លាភាព គណនេយ្យភាព និងយុត្តិធម៌។ ចំពោះបញ្ហាដែលលើសសមត្ថកិច្ច ត្រូវរាយការណ៍ជូនរដ្ឋបាលខេត្ត ដើម្បីពិនិត្យ និងដោះស្រាយឆ្លើយតបឱ្យបានទាន់ពេលវេលា និងមានប្រសិទ្ធភាព។
សូមជម្រាបផងដែរថា ក្នុងកិច្ចប្រជុំនេះ ក្រុមប្រឹក្សាខេត្ត បានធ្វើការពិនិត្យ ពិភាក្សា អនុម័ត និងផ្សព្វផ្សាយលិខិតបទដ្ឋានគតិយុត្តនានា សរុបចំនួន ០៩ របៀបវារៈសំខាន់ៗ៕
ដោយ៖ សុខ ស៊ីណាន
