រដ្ឋមន្ត្រីពាណិជ្ជកម្មបង្ហាញសក្ដានុពលវិនិយោគ និងការពង្រីកទីផ្សារនៅសិង្ហបុរី

នាព្រឹកថ្ងៃទី៩ ខែមេសា ឆ្នាំ២០២៦ នៅមជ្ឈមណ្ឌលសហព័ន្ធធុរកិច្ចសិង្ហបុរី លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្មកម្ពុជា បានថ្លែងថា កម្ពុជាជាទិសដៅយុទ្ធសាស្ត្រសម្រាប់ធុរកិច្ចសិង្ហបុរីក្នុងការពង្រីកទីផ្សារពាណិជ្ជកម្មក្នុងតំបន់។ លោកជំទាវបានលើកឡើងពីការបន្តគោលនយោបាយបើកចំហពាណិជ្ជកម្ម ទាក់ទាញវិនិយោគ សម្រួលពាណិជ្ជកម្ម ជំរុញការនាំចេញ និងធ្វើទំនើបកម្មបរិយាកាសធុរកិច្ច។

លោកជំទាវបានដឹកនាំគណៈប្រតិភូកម្ពុជាចូលរួមសិក្ខាសាលា «Cambodia: Business Outlook 2026 and Unlocking Opportunities» រៀបចំដោយ Singapore Business Federation (SBF) សហការជាមួយ Aquarii BD Cambodia។ ធុរជនកម្ពុជា តំណាងវិស័យឯកជនសិង្ហបុរី សមាជិកសហព័ន្ធធុរកិច្ច វិនិយោគិន និងដៃគូពាណិជ្ជកម្មបានចូលរួមក្នុងកម្មវិធីនេះ។

សិក្ខាសាលាផ្ដោតលើការផ្ដល់ព័ត៌មានអំពីសក្ដានុពលសេដ្ឋកិច្ចកម្ពុជា និងពិភាក្សាឱកាសសហប្រតិបត្តិការក្នុងវិស័យអាទិភាព រួមមានភស្តុភារ និងការគ្រប់គ្រងខ្សែច្រវាក់ផ្គត់ផ្គង់ កសិ-ឧស្សាហកម្ម និងការកែច្នៃម្ហូបអាហារ សេដ្ឋកិច្ចឌីជីថល និងឧស្សាហកម្មតម្លៃបន្ថែមខ្ពស់។

លោកជំទាវរដ្ឋមន្ត្រីបានបញ្ជាក់ថា វេទិកានេះអាចជួយជំរុញការទូតពាណិជ្ជកម្ម បណ្ដាញធុរកិច្ច ការនាំចេញ ការពង្រីកទីផ្សារអន្តរជាតិ និងការទាក់ទាញវិនិយោគថ្មី។ វាផ្ដល់ឱកាសឱ្យធុរជនកម្ពុជាបង្ហាញសមត្ថភាពផលិតកម្ម ស្វែងរកដៃគូថ្មី ពង្រឹងកិច្ចសហប្រតិបត្តិការពាណិជ្ជកម្ម និងពង្រីកការចូលដល់ទីផ្សារសិង្ហបុរី និងទីផ្សារអន្តរជាតិផ្សេងៗ។

សេចក្ដីរាយការណ៍ក៏បានលើកឡើងថា វេទិកាបង្ហាញការប្ដេជ្ញារបស់កម្ពុជាក្នុងការកសាងភាពជាដៃគូធុរកិច្ចយូរអង្វែង បង្កើនតម្លៃបន្ថែមផលិតផល និងធ្វើឱ្យកិច្ចសហប្រតិបត្តិការសេដ្ឋកិច្ចកម្ពុជា-សិង្ហបុរីកាន់តែស៊ីជម្រៅ និងមានប្រសិទ្ធភាព។

លោកជំទាវបានអញ្ជើញវិនិយោគិន និងធុរជនសិង្ហបុរីមកស្វែងយល់បន្ថែមអំពីសក្ដានុពលកម្ពុជា ដើម្បីស្វែងរកឱកាសថ្មីក្នុងការវិនិយោគ ពាណិជ្ជកម្ម និងភាពជាដៃគូជាមួយធុរជនកម្ពុជា តាមរយៈកិច្ចសហប្រតិបត្តិការក្នុងវិស័យបំពេញឱ្យគ្នា។ ដោយ៖ សុខ ស៊ីណាន