កម្ពុជានិងចិនបានឯកភាពពង្រីកកិច្ចសន្ទនា «២+២» ទៅជា «៣+៣» ដោយបញ្ចូលក្រសួងមហាផ្ទៃកម្ពុជា និងក្រសួងសន្តិសុខសាធារណៈចិន ដើម្បីឆ្លើយតបនឹងការកើនឡើងនៃកិច្ចសហប្រតិបត្តិការទ្វេភាគី និងការវិវត្តនៃសភាពការណ៍តំបន់និងអន្តរជាតិ។
យោងតាមសេចក្ដីប្រកាសព័ត៌មានរបស់ក្រសួងការបរទេសកម្ពុជា ការឯកភាពនេះបានកើតឡើងក្នុងកិច្ចសន្ទនាយុទ្ធសាស្ត្រ «២+២» លើកទី១ រវាងរដ្ឋមន្ត្រីការបរទេសនិងការពារជាតិកម្ពុជា-ចិន នៅភ្នំពេញ ថ្ងៃទី២២ ខែមេសា។ ភាគីកម្ពុជាដឹកនាំដោយឯកឧត្តម ប្រាក់ សុខុន ឧបនាយករដ្ឋមន្ត្រី និងរដ្ឋមន្ត្រីការបរទេសនិងសហប្រតិបត្តិការអន្តរជាតិ និងឯកឧត្តម ទៀ សីហា ឧបនាយករដ្ឋមន្ត្រី និងរដ្ឋមន្ត្រីការពារជាតិ។ ភាគីចិនដឹកនាំដោយឯកឧត្តម វ៉ាង យី រដ្ឋមន្ត្រីការបរទេស និងឯកឧត្តម តុង ជុន រដ្ឋមន្ត្រីការពារជាតិ។
ក្រសួងបានចាត់ទុកកិច្ចសន្ទនាលើកដំបូងនេះជាព្រឹត្តិការណ៍សំខាន់នៃទំនាក់ទំនងកម្ពុជា-ចិន ដែលបង្ហាញការប្ដេជ្ញាចិត្តរួមក្នុងការពង្រឹងការសម្របសម្រួលយុទ្ធសាស្ត្រ និងជំរុញសហគមន៍វាសនារួមកម្ពុជា-ចិនគ្រប់រដូវកាលក្នុងយុគសម័យថ្មី។
ភាគីទាំងពីរបានវាយតម្លៃជាវិជ្ជមានថា ភាពជាដៃគូយុទ្ធសាស្ត្រគ្រប់ជ្រុងជ្រោយកំពុងវិវត្តទៅមុខដោយមានទិសដៅច្បាស់លាស់ និងបង្ហាញភាពធន់និងភាពចាស់ទុំ។ ភាគីទាំងពីរបានបញ្ជាក់ជាថ្មីនូវមិត្តភាពដែកថែប ផ្អែកលើការគោរព ទំនុកចិត្ត និងការគាំទ្រផលប្រយោជន៍ស្នូលគ្នា។ កម្ពុជាបានគាំទ្រគំនិតផ្ដួចផ្ដើមខ្សែក្រវាត់និងផ្លូវ និងគំនិតផ្ដួចផ្ដើមសកលទាំងបួនរបស់ប្រធានាធិបតី ស៊ី ជីនពីង ស្ដីពីការអភិវឌ្ឍ សន្តិសុខ អរិយធម៌ និងអភិបាលកិច្ច។ ភាគីទាំងពីរក៏បានផ្លាស់ប្ដូរទស្សនៈលើបញ្ហានយោបាយ សន្តិសុខ សេដ្ឋកិច្ច តំបន់ និងអន្តរជាតិ។
ភាគីទាំងពីរបានសង្កត់ធ្ងន់លើការរក្សាទស្សនកិច្ចកម្រិតខ្ពស់ ការពង្រឹងទំនាក់ទំនងស្ថាប័ន និងការសម្របសម្រួលរវាងក្រសួងនិងស្ថាប័ន។ ភាគីទាំងពីរបានឯកភាពថា យន្តការ «២+២» នឹងជាវេទិកាសំខាន់សម្រាប់ទំនាក់ទំនងយុទ្ធសាស្ត្រកាន់តែស៊ីជម្រៅ ការសម្របសម្រួលគោលនយោបាយ និងការឆ្លើយតបរួមចំពោះបញ្ហាប្រឈមក្នុងប្រទេសរៀងៗខ្លួន តំបន់ និងពិភពលោក។
សម្រាប់អនាគត ភាគីទាំងពីរបានឯកភាពពង្រឹងកិច្ចសហប្រតិបត្តិការជាក់ស្ដែងលើវិស័យប្រពៃណី និងវិស័យថ្មីៗមានសក្ដានុពល រួមមានបរិវត្តកម្មឌីជីថល ការអភិវឌ្ឍបៃតង សេដ្ឋកិច្ចពណ៌ខៀវ ការតភ្ជាប់ ខ្សែច្រវាក់ផ្គត់ផ្គង់មានភាពធន់ កិច្ចសហប្រតិបត្តិការហិរញ្ញវត្ថុ និងការផ្លាស់ប្ដូរប្រជាជន។
ភាគីទាំងពីរបានបញ្ជាក់ឡើងវិញនូវការប្ដេជ្ញាចិត្តជំរុញក្របខ័ណ្ឌសំខាន់ៗ រួមមានក្របខ័ណ្ឌកិច្ចសហប្រតិបត្តិការត្បូងពេជ្រ ច្រករបៀងឧស្សាហកម្មនិងបច្ចេកវិទ្យា និងច្រករបៀងមច្ឆានិងអង្ករ ដើម្បីនាំមកនូវលទ្ធផលជាក់ស្ដែង និងផលប្រយោជន៍ទៅវិញទៅមកសម្រាប់ប្រទេសនិងប្រជាជនទាំងពីរ។
ភាគីទាំងពីរក៏បានបញ្ជាក់ឡើងវិញនូវការប្ដេជ្ញាចិត្តពង្រឹងភាពជាដៃគូយុទ្ធសាស្ត្រគ្រប់ជ្រុងជ្រោយ ដើម្បីរួមចំណែកដល់វិបុលភាពនៃប្រទេសទាំងពីរ សន្តិភាព ស្ថិរភាព និងការអភិវឌ្ឍក្នុងតំបន់និងពិភពលោក។
ដោយ៖ ង៉ែត ពិសាន្ត
