អភិបាលខេត្តព្រះសីហនុស្នើការគាំទ្រពីសិង្ហបុរី ដើម្បីជំរុញការវិនិយោគនិងទេសចរណ៍

ខេត្តព្រះសីហនុ៖ ឯកឧត្តម ម៉ាង ស៊ីណេត អភិបាលខេត្តព្រះសីហនុ បានទទួលជំនួបសម្តែងការគួរសមជាមួយ ឯកឧត្តម Steven Pang ឯកអគ្គរដ្ឋទូតវិសាមញ្ញ និងពេញសមត្ថភាព នៃសាធារណរដ្ឋសិង្ហបុរី ប្រចាំព្រះរាជាណាចក្រកម្ពុជា នៅសាលាខេត្តព្រះសីហនុ កាលពីរសៀលថ្ងៃទី២៨ ខែមេសា ឆ្នាំ២០២៦។

ក្នុងជំនួបនេះ ឯកឧត្តមអភិបាលខេត្ត បានបង្ហាញពីសក្តានុពលរបស់ខេត្តព្រះសីហនុ និងបានស្នើសុំការគាំទ្រពីភាគីសិង្ហបុរី ក្នុងការជំរុញវិនិយោគិនមកវិនិយោគ និងទេសចរណ៍នៅខេត្តនេះ។ ឯកឧត្តមបានបញ្ជាក់ថា ខេត្តព្រះសីហនុមានហេដ្ឋារចនាសម្ព័ន្ធគ្រប់គ្រាន់ រួមមាន ផ្លូវគោក ផ្លូវទឹក ផ្លូវអាកាស និងផ្លូវដែក ព្រមទាំងមានកំពង់ផែអន្តរជាតិទឹកជ្រៅ ដែលងាយស្រួលសម្រាប់ការដឹកជញ្ជូនទៅកាន់ទីផ្សារពិភពលោក។

ជាមួយគ្នានេះ រាជរដ្ឋាភិបាលកម្ពុជា បានកំណត់ខេត្តព្រះសីហនុ ជាតំបន់សេដ្ឋកិច្ចពិសេសគំរូពហុបំណង ដោយផ្តោតលើការអភិវឌ្ឍជាតំបន់ឡូជីស្ទីក និងសេវាដឹកជញ្ជូនទំនើប ទីក្រុងសមាហរណកម្ម និងតំបន់ទេសចរណ៍ធម្មជាតិតាមកោះ។ បន្ថែមពីនេះ រាជរដ្ឋាភិបាលក៏បានវិនិយោគសាងសង់ផ្លូវបេតុងជាច្រើនខ្សែក្នុងក្រុង និងកំពុងជំរុញការដាំដើមឈើ ដើម្បីអភិវឌ្ឍឱ្យក្លាយជាទីក្រុងបៃតង និងទីក្រុងឆ្លាតវៃ។

សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា ក៏បានដាក់ចេញកម្មវិធីពិសេស ដើម្បីជំរុញការវិនិយោគនៅខេត្តព្រះសីហនុ ដោយផ្តោតលើការលើកលែងពន្ធ និងការសម្រួលនីតិវិធីរដ្ឋបាល។

ឯកឧត្តម Steven Pang បានថ្លែងអំណរគុណចំពោះការស្វាគមន៍យ៉ាងកក់ក្តៅ និងបានលើកឡើងថា ខេត្តព្រះសីហនុ គឺជាខេត្តដែលមានសក្តានុពលខ្ពស់សម្រាប់ការវិនិយោគ និងទេសចរណ៍ ដោយផ្អែកលើកត្តាសំខាន់ៗ រួមមាន៖ ប្រវត្តិសាស្ត្រនៃការអភិវឌ្ឍដែលចាប់ផ្តើមតាំងពីសម័យសម្តេចព្រះករុណា នរោត្តម សីហនុ បន្តមកសម្តេចតេជោ ហ៊ុន សែន និងបច្ចុប្បន្នសម្តេចធិបតី ហ៊ុន ម៉ាណែត ក៏ដូចជាការរីកចម្រើននៃកំពង់ផែព្រះសីហនុ ដែលជាច្រកសំខាន់សម្រាប់ពាណិជ្ជកម្មអន្តរជាតិ។

ឯកឧត្តមឯកអគ្គរដ្ឋទូត ក៏បានបញ្ជាក់ថា គោលបំណងនៃដំណើរទស្សនកិច្ចនេះ គឺដើម្បីស្វែងយល់ពីឱកាសវិនិយោគនៅកម្ពុជា ជាពិសេសនៅខេត្តព្រះសីហនុ និងជំរុញកិច្ចសហប្រតិបត្តិការផ្នែកពាណិជ្ជកម្ម ដឹកជញ្ជូន និងការនាំចេញផលិតផលកសិកម្មពីកម្ពុជាទៅកាន់ប្រទេសសិង្ហបុរី និងទីផ្សារអន្តរជាតិផ្សេងៗ។

ភាគីទាំងពីរ បានឯកភាពបន្តពង្រឹងកិច្ចសហប្រតិបត្តិការលើវិស័យសេដ្ឋកិច្ចបៃតង ថាមពល បច្ចេកវិទ្យា និងហេដ្ឋារចនាសម្ព័ន្ធ ខណៈដំណើរទស្សនកិច្ចនេះក៏បានរួមចំណែកជំរុញការវិនិយោគ ពាណិជ្ជកម្ម និងការអភិវឌ្ឍធនធានមនុស្សនៅខេត្តព្រះសីហនុផងដែរ៕

អត្ថបទ៖ ប៉ៃ សុឃីម

រូបភាព៖ កែវ ដារ៉ា

រូបភាពកិច្ចជំនួប។