បន្ទាប់ពីកើតមានគ្រោះថ្នាក់ចរាចរណ៍២ករណីធំៗនៅខេត្តកំពង់ឆ្នាំង និងខេត្តស្វាយរៀងបានសម្លាប់ជីវិតកម្មករចំនួន១៤នាក់ និងរបួស៧៩នាក់ នាព្រឹកថ្ងៃសៅរ៍ ទី២៣ ខែឧសភានេះ ក្រសួងការងារ និងបណ្តុះបណ្តាលវិជ្ជាជីវៈ អះអាងថា ក្រសួងនឹងធ្វើការជាមួយស្ថាប័នពាក់ព័ន្ធបន្ថែមទៀត ដើម្បីបង្កើនសុវត្ថិភាពដឹកជញ្ជូនកម្មករនិយោជិត។
តាមរបាយការណ៍របស់ក្រសួងការងារ គិតត្រឹមម៉ោង១០ព្រឹកថ្ងៃសៅរ៍នេះ ចំនួនកម្មករនិយោជិតរងគ្រោះដោយសារគ្រោះថ្នាក់ចរាចរណ៍មានសរុប ៩៣នាក់ ក្នុងនោះស្លាប់ ១៤នាក់ របួសធ្ងន់ ១៥នាក់ និងរបួសស្រាល ៦៤នាក់។ ក្នុងរបាយការណ៍ក្រសួង បានលម្អិតទៀតថា ករណីទី១៖ កើតឡើងនៅភូមិសាលាលេខ៥ ឃុំអូរឬស្សី ស្រុកកំពង់ត្រឡាច ខេត្តកំពង់ឆ្នាំង រវាងរថយន្តដឹកទំនិញធុនធំជាមួយរថយន្តដឹកកម្មករនិយោជិត មានជនរងគ្រោះ៥៣នាក់(ស្រី៥០នាក់) ក្នុងនោះស្លាប់៩នាក់ (ស្រី៨នាក់) របួសធ្ងន់៩នាក់ (ស្រី៨នាក់) និងរបួសស្រាល ៣៥នាក់ (ស្រី ៣៤នាក់)។ ចំណែក ករណីទី២ កើតឡើងនៅក្រុងស្វាយរៀង ខេត្តស្វាយរៀង រវាងរថយន្តដឹកកម្មករនិងរថយន្តដឹកកម្មករ បង្កឱ្យមានជនរងគ្រោះ ៤០នាក់ (ស្រី២៤នាក់) ក្នុងនោះស្លាប់ ៥នាក់ (ស្រី២នាក់) របួសធ្ងន់ ៦នាក់ (ស្រី ៤នាក់) និងរបួសស្រាល ២៩នាក់ (ស្រី១៨នាក់)។
ក្រសួងការងារបានបង្ហាញក្តីសោកស្តាយចំពោះការបាត់បង់ជីវិតកម្មករនិយោជិត។ អត្ថបទដើមបានរំលឹកពីការប្រកាសកន្លងមករបស់រដ្ឋមន្ត្រីក្រសួងការងារ ឯកឧត្តម ហេង សួរ អំពីការរៀបចំមធ្យោបាយដឹកជញ្ជូនកម្មកររោងចក្រឱ្យមានសុវត្ថិភាព និងផាសុកភាពនៅត្រឹមឆ្នាំ២០២៧។ គ្រោះថ្នាក់ទាំងនេះបង្ហាញថា សុវត្ថិភាពដឹកជញ្ជូនកម្មករនៅតែជាបញ្ហាប្រឈម៕
ដោយ៖ ង៉ែត ពិសាន្ត
