ខេត្តរតនគិរី បានទទួលស្វាគមន៍និស្សិតអាហារូបករណ៍បរទេស និងគណៈប្រតិភូសរុបចំនួន ១៨១នាក់ ក្នុងនោះមានគណៈប្រតិភូដឹកនាំ ១១រូប និងនិស្សិតបរទេស ១៧០នាក់ (ស្រី ៦២នាក់) មកបំពេញទស្សនកិច្ចសិក្សារយៈពេល ៣ថ្ងៃ ចាប់ពីថ្ងៃទី២៤ ដល់ថ្ងៃទី២៦ ខែមិថុនា ឆ្នាំ២០២៦ ដើម្បីស្វែងយល់ពីសក្ដានុពលទេសចរណ៍ធម្មជាតិ និងវប្បធម៌ជនជាតិដើមភាគតិចនៅក្នុងខេត្ត។
ក្នុងចំណោមនិស្សិតទាំងនោះ មាននិស្សិតមកពីប្រទេសវៀតណាមចំនួន ៩១នាក់ ឡាវ ៧១នាក់ និងចិន ៨នាក់ ដែលបានអញ្ជើញទៅទស្សនាតំបន់រមណីយដ្ឋានធម្មជាតិ និងភូមិសហគមន៍ជនជាតិដើមភាគតិចនានាក្នុងខេត្តរតនគិរី។
បើតាមមន្ទីរទេសចរណ៍ខេត្តរតនគិរី កម្មវិធីនេះមានគោលបំណងណែនាំ និងបង្ហាញពីសក្ដានុពលទេសចរណ៍ វប្បធម៌ អរិយធម៌ ប្រពៃណី ទំនៀមទម្លាប់ និងជីវភាពរស់នៅរបស់បងប្អូនជនជាតិដើមភាគតិច ដើម្បីឱ្យនិស្សិតបរទេសបានយល់ដឹងកាន់តែច្បាស់អំពីភាពសម្បូរបែបនៃវប្បធម៌ និងធនធានធម្មជាតិរបស់កម្ពុជា។
មន្ទីរទេសចរណ៍បានបញ្ជាក់ថា ដំណើរទស្សនកិច្ចនេះ មិនត្រឹមតែជួយផ្សព្វផ្សាយសក្ដានុពលទេសចរណ៍របស់ខេត្តរតនគិរីទៅកាន់ឆាកអន្តរជាតិប៉ុណ្ណោះទេ ប៉ុន្តែថែមទាំងរួមចំណែកពង្រឹងចំណងមិត្តភាព សាមគ្គីភាព និងកិច្ចសហប្រតិបត្តិការផ្នែកវប្បធម៌រវាងកម្ពុជា វៀតណាម ឡាវ និងចិន ឱ្យកាន់តែរឹងមាំ និងស៊ីជម្រៅថែមទៀត៕
ដោយ៖ ប៉ៃ សុឃីម
