ឯកឧត្តមរដ្ឋមន្ត្រី ថោ ជេដ្ឋា ចាត់ក្រុមការងារចុះពិនិត្យផលប៉ះពាល់គ្រោះរាំងស្ងួតនៅបាត់ដំបង ខណៈតំបន់ប្រឈមខ្វះទឹកទទួលបានភ្លៀងគ្រប់គ្រាន់

បាត់ដំបង៖ តាមការចាត់តាំងរបស់ ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម ក្រុមការងារមន្ទីរធនធានទឹក និងឧតុនិយមខេត្តបាត់ដំបង បានចុះពិនិត្យ និងវាយតម្លៃស្ថានភាពជាក់ស្តែងនៅតំបន់រងផលប៉ះពាល់ដោយសារគ្រោះរាំងស្ងួត ក្នុងភូមិសាស្ត្រស្រុកសង្កែ និងស្រុកឯកភ្នំ ខេត្តបាត់ដំបង។

ការចុះពិនិត្យនេះ បានប្រព្រឹត្តទៅនៅថ្ងៃទី៤ ខែកក្កដា ឆ្នាំ២០២៦ ដឹកនាំដោយ លោក ខៃ សុដា ប្រធានមន្ទីរធនធានទឹក និងឧតុនិយមខេត្តបាត់ដំបង ក្នុងនាមជាតំណាងដ៏ខ្ពង់ខ្ពស់របស់ ឯកឧត្តមរដ្ឋមន្ត្រី ថោ ជេដ្ឋា។ ក្រុមការងារបានសហការជាមួយមន្ត្រីបច្ចេកទេសនៃមន្ទីរ រួមជាមួយប្រធានការិយាល័យកសិកម្ម បរិស្ថាន និងធនធានធម្មជាតិស្រុក អាជ្ញាធរមូលដ្ឋាន និងមន្ត្រីកសិកម្មឃុំ ដើម្បីពិនិត្យស្ថានភាពដំណាំស្រូវ និងប្រភពទឹកនៅតំបន់ដែលរងផលប៉ះពាល់។

តាមការវាយតម្លៃរបស់ក្រុមការងារ ផ្ទៃដីស្រែដែលរងផលប៉ះពាល់ភាគច្រើនស្ថិតនៅឆ្ងាយពីប្រភពទឹក ដែលធ្វើឱ្យការផ្គត់ផ្គង់ទឹកសង្គ្រោះជួបការលំបាក។ កន្លងមក ផ្ទៃដីបង្កបង្កើនផលស្រូវដែលទទួលរងផលប៉ះពាល់ដោយសារគ្រោះរាំងស្ងួតមានសរុប ១៨,៣៦២ហិកតា ក្នុងនោះ ស្រុកសង្កែមាន ១០,៥៩៣ហិកតា និងស្រុកឯកភ្នំមាន ៧,៧៦៩ហិកតា។

ទោះជាយ៉ាងណា គិតត្រឹមថ្ងៃទី៤ ខែកក្កដា ឆ្នាំ២០២៦ ស្ថានភាពបានវិវឌ្ឍទៅក្នុងទិសដៅល្អប្រសើរ ដោយតំបន់ដែលធ្លាប់ប្រឈមនឹងការខ្វះខាតទឹក បានទទួលទឹកភ្លៀងគ្រប់គ្រាន់ ដែលបានរួមចំណែកកាត់បន្ថយហានិភ័យ និងជួយស្តារស្ថានភាពផលិតកម្មកសិកម្មរបស់ប្រជាកសិករនៅក្នុងភូមិសាស្ត្រទាំងពីរ។

ដោយ៖ KPS99TV