នាល្ងាចថ្ងៃទី២៧ ខែកក្កដា ប្រតិភូក្រុមបាល់ទះបុរសជម្រើសជាតិកម្ពុជាទាំងមូល បានវិលត្រឡប់មកដល់មាតុប្រទេសដោយជោគជ័យ។ ក្រុមគ្រូបង្វឹក និងកីឡាករបាននាំយកពានរង្វាន់ជើងឯក និងមេដាយមាសមកដល់ប្រទេសកម្ពុជាដោយសុវត្ថិភាព ដោយបញ្ចប់បេសកកម្មប្រកួតរបស់ខ្លួនយ៉ាងជោគជ័យ។
ក្នុងការប្រកួតជើងទី១ នៃពានរង្វាន់បាល់ទះអាស៊ីអាគ្នេយ៍ ឆ្នាំ២០២៦ (SEA V-Cup) ដែលទើបបានបញ្ចប់ ក្រុមបាល់ទះបុរសកម្ពុជាបានបង្ហាញសមត្ថភាពលេចធ្លោ និងខិតខំប្រកួតរហូតដណ្តើមបានជើងឯក ដោយសម្រេចបាននូវសមិទ្ធផលជាប្រវត្តិសាស្ត្រសម្រាប់វិស័យបាល់ទះជាតិ និងបង្កើតកំណត់ត្រាថ្មីក្នុងការប្រកួតនេះ។
នាយប់នោះ ឯកឧត្តម ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានសហព័ន្ធកីឡាបាល់ទះកម្ពុជា ព្រមទាំងលោកជំទាវ បានអញ្ជើញដោយផ្ទាល់មកទទួលស្វាគមន៍ប្រតិភូបាល់ទះដែលវិលត្រឡប់មកវិញដោយជោគជ័យ និងបានថ្លែងអបអរសាទរ ព្រមទាំងសាកសួរសុខទុក្ខក្រុមគ្រូបង្វឹក និងកីឡាករយ៉ាងកក់ក្តៅ។ តំណាងក្រសួងអប់រំ យុវជន និងកីឡា មន្ត្រីនៃអង្គភាពពាក់ព័ន្ធ និងប្រជាពលរដ្ឋជាច្រើន ក៏បានចូលរួមទទួលស្វាគមន៍ក្រុមកីឡាករ អបអរសាទរសមិទ្ធផលជាប្រវត្តិសាស្ត្រ និងសាទរចំពោះលទ្ធផលដ៏ល្អរបស់ក្រុមជម្រើសជាតិផងដែរ។
