យោងតាមទិន្នន័យពីការិយាល័យស្ថិតិជាតិចិន (NBS) បានបង្ហាញឱ្យដឹងនៅថ្ងៃចន្ទ ទី១៩ ខែតុលានេះថា ផលិតផលក្នុងស្រុកសរុប ឬ GDP របស់ប្រទេសចិនបានកើនឡើង ៤.៦% បើធៀបនឹងរយៈពេលដូចគ្នាកាលពីឆ្នាំមុន ដោយឈានដល់ទំហំទឹកប្រាក់ ១០៧.១១ ពាន់ពាន់លានយន់ ឬស្មើនឹងប្រមាណ ១៦ ពាន់ពាន់លានដុល្លារអាមេរិក ក្នុងរយៈពេល ៩ ខែដំបូងក្នុងឆ្នាំនេះ។ តួលេខថ្មីស្រឡាងនេះ គឺស្ថិតក្នុងរង្វង់គោលដៅកំណើន GDP ប្រចាំឆ្នាំក្នុងចន្លោះ ៤.៥% ដល់ ៥% ដែលនេះបង្ហាញថា ប្រទេសសេដ្ឋកិច្ចធំជាងគេទីពីរនៅលើពិភពលោកមួយនេះ កំពុងបន្តដំណើរការលើគន្លងដ៏ល្អប្រសើរ និងបង្កើតគ្រឹះយ៉ាងរឹងមាំសម្រាប់សម្រេចគោលដៅកំណើនពេញមួយឆ្នាំ។
នៅក្នុងត្រីមាសទី៣ GDP របស់ប្រទេសចិន បានកើនឡើង ៤.៥% បើធៀបនឹងឆ្នាំមុន ដែលកើនពីកំណើន ៤.៣% ដែលបានកត់ត្រាក្នុងត្រីមាសទី ២ ខណៈដែលអ្នកវិភាគចិនបានរំពឹងទុកថា ទិន្នន័យក្នុងត្រីមាសទី៤ នឹងកាន់តែងើបឡើងខ្ពស់ថែមទៀត នៅពេលដែលវិធានការគោលនយោបាយជាច្រើនចូលជាធរមាន។
យោងតាមទិន្នន័យគយចិនបានបង្ហាញថា នៅក្នុងត្រីមាសទី៣ នៃឆ្នាំនេះ កំណើនពាណិជ្ជកម្មបរទេសរបស់ចិន បានឈានដល់កម្រិតខ្ពស់បំផុតក្នុងរយៈពេល ៥ ឆ្នាំ។ ក្នុងរយៈពេល៩ខែដំបូងនៃឆ្នាំនេះ ការនាំចេញបានកើនឡើង ១៦.៤% ខណៈដែលការនាំចូលបានកើនឡើង ២២.៣%៕អត្ថបទដោយ៖ រិទ្ធី
