ថ្មីៗនេះ ប៉ូលិសថៃបានធ្វើប្រតិបត្តិការឆ្មក់ទូទាំងប្រទេស និងបង្ក្រាបបណ្តាញឆបោកនិងលាងលុយឆ្លងដែនមួយ ដែលសង្ស័យថាបានប្រើទិដ្ឋាការ «Thailand Elite Visa» ជាលេសបិទបាំងសកម្មភាព។ ក្រុមនេះបានល្បួងជនរងគ្រោះដោយសន្យាផ្តល់ប្រាក់ចំណេញខ្ពស់ពីការជួញដូរភាគហ៊ុនក្នុងបរិមាណច្រើន តាមរយៈវេទិកាវិនិយោគក្លែងក្លាយ។ ប៉ូលិសបានឱ្យដឹងថា ជនរងគ្រោះតែម្នាក់បានខាតបង់ប្រាក់រហូតដល់២៦,៥១លានបាត។
ការស៊ើបអង្កេតបង្ហាញថា ក្រុមនេះបានផ្ទេរប្រាក់របស់ជនរងគ្រោះចូលគណនីក្រុមហ៊ុនជាច្រើន រួចបន្តផ្ទេរជាច្រើនដំណាក់កាលតាមរយៈបណ្តាញផ្ទេរប្រាក់ក្រៅប្រព័ន្ធ វេទិកាទូទាត់ភាគីទីបី និងការទិញ USDT ដោយប្រើកាបូបរូបិយប័ណ្ណឌីជីថលដែលអ្នកប្រើប្រាស់គ្រប់គ្រងដោយខ្លួនឯង (non-custodial wallets) ដើម្បីលាក់បាំងលំហូរប្រាក់។ ប៉ូលិសក៏បានរកឃើញថា ក្រុមនេះសង្ស័យថាបានប្រើប្រាក់បានពីសកម្មភាពខុសច្បាប់ទៅទិញផ្ទះប្រណីតចំនួន៨ខ្នងនៅទីក្រុងបាងកក និងខេត្តសាមុតប្រាកាន រួមទាំងអចលនទ្រព្យជួលរយៈពេល៣០ឆ្នាំ និងរថយន្តប្រណីតជាច្រើនគ្រឿង ដើម្បីលាក់បាំងប្រភពប្រាក់។
ក្នុងប្រតិបត្តិការនេះ ប៉ូលិសបានឆែកឆេរទីតាំងចំនួន២៧កន្លែង ក្នុងខេត្តចំនួន១១ និងរឹបអូសទ្រព្យសម្បត្តិ រួមមានផ្ទះប្រណីត រថយន្តប្រណីត រូបិយប័ណ្ណគ្រីបតូ និងសាច់ប្រាក់ ដែលមានតម្លៃសរុបលើសពី៥០០លានបាត។ តុលាការបានចេញដីកាចាប់ខ្លួនជនសង្ស័យចំនួន៧១នាក់ រួមមានជនជាតិចិន២១នាក់ ជនជាតិថៃ៤១នាក់ និងជនជាតិផ្សេងទៀត។ រហូតមកដល់ពេលនេះ មនុស្ស៣៩នាក់ត្រូវបានចាប់ខ្លួន។
ក្នុងអំឡុងពេលសួរចម្លើយ ជនសង្ស័យជាជនជាតិចិនមួយចំនួនដែលត្រូវបានចាប់ខ្លួនបានសារភាពថា ចាប់តាំងពីឆ្នាំ២០២២ ពួកគេបានចាត់ចែងប្រាក់ឱ្យដៃគូជាន់ខ្ពស់នៃមណ្ឌលឆបោកនៅប៉ោយប៉ែត ប្រទេសកម្ពុជា ដោយពាក់ព័ន្ធនឹងការលាងលុយយ៉ាងហោចណាស់៣ពាន់លានបាត។
បច្ចុប្បន្ន ជនសង្ស័យ២២នាក់នៅតែរត់គេចខ្លួននៅបរទេស។ ប៉ូលិសថៃកំពុងបន្តពង្រីកការស៊ើបអង្កេត និងខិតខំតាមចាប់ខ្លួនពួកគេ។
