ខេត្តព្រះសីហនុ៖ នៅព្រឹកថ្ងៃទី២២ ខែតុលា ឆ្នាំ២០២៦ នេះ រដ្ឋបាលខេត្តព្រះសីហនុ បានបើកកិច្ចប្រជុំពិភាក្សាការងារត្រៀមរៀបចំព្រឹត្តិការណ៍បុណ្យសមុទ្រ លើកទី១២ ជុំទី៤ ឆ្នាំ២០២៦ ក្រោមអធិបតីភាពដ៏ខ្ពង់ខ្ពស់របស់ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ នៅសាលប្រជុំសាលាខេត្តព្រះសីហនុ។
ក្នុងឱកាសនោះ លោក សាមុត សុធារិទ្ធ អភិបាលរងខេត្តព្រះសីហនុ បានអញ្ជើញចូលរួមជាតំណាងដ៏ខ្ពង់ខ្ពស់របស់ ឯកឧត្តម ម៉ាង ស៊ីណេត អភិបាល នៃគណៈអភិបាលខេត្តព្រះសីហនុ រួមជាមួយថ្នាក់ដឹកនាំខេត្ត និងមន្ត្រីជំនាញពាក់ព័ន្ធជាច្រើនរូប។
កិច្ចប្រជុំនេះរៀបចំឡើងដើម្បីពិភាក្សា និងបែងចែកភារកិច្ចលម្អិត សំដៅធានាឱ្យដំណើរការរៀបចំព្រឹត្តិការណ៍ជាតិដ៏មានសារៈសំខាន់មួយនេះប្រព្រឹត្តទៅដោយរលូន ប្រកបដោយភាពទាក់ទាញ សន្តិសុខ និងសណ្តាប់ធ្នាប់ខ្ពស់។
គួររំលឹកផងដែរថា ព្រឹត្តិការណ៍បុណ្យសមុទ្រលើកទី១២ នេះ នឹងប្រារព្ធឡើងក្រោមប្រធានបទដ៏មានអត្ថន័យជ្រាលជ្រៅគឺ «គុណតម្លៃសមុទ្រ៖ សេដ្ឋកិច្ចខៀវផ្សារភ្ជាប់ចីរភាពជីវចម្រុះតំបន់ឆ្នេរសមុទ្រ» ដែលជាសារមួយដ៏សំខាន់ក្នុងការលើកកម្ពស់សក្តានុពលទេសចរណ៍ឆ្នេរ ជំរុញកំណើនសេដ្ឋកិច្ចជាតិ ព្រមទាំងបំផុសការយល់ដឹងអំពីការអភិរក្សបរិស្ថាន និងធនធានធម្មជាតិសមុទ្រកម្ពុជាឱ្យបានគង់វង្សយូរអង្វែង៕
ដោយ៖ ប៉ៃ សុឃីម
