អាជ្ញាធរអនុវត្តច្បាប់ម៉ាឡេស៊ីបានធ្វើប្រតិបត្តិការជាច្រើននៅរដ្ឋម៉ាឡាកានាពេលថ្មីៗនេះ ដោយបង្ក្រាបទីតាំងសង្ស័យពាក់ព័ន្ធការឆបោកឆ្លងដែនចំនួន៣កន្លែង និងឃាត់ខ្លួនមនុស្សសរុប៦៣នាក់ ក្នុងនោះមានអ្នកមកពីចិនដីគោក និងតៃវ៉ាន់។
បន្ទាប់ពីប្រមូលព័ត៌មានសម្ងាត់រយៈពេលមួយខែ នាយកដ្ឋានអន្តោប្រវេសន៍ម៉ាឡេស៊ី និងគណៈកម្មការទំនាក់ទំនង និងពហុព័ត៌មានម៉ាឡេស៊ី បានឆ្មក់ចូលមជ្ឈមណ្ឌលហៅទូរស័ព្ទឆបោកមួយដែលក្លែងខ្លួនជាផ្ទះសំណាក់នៅ Klebang។ អាជ្ញាធរបានឃាត់ខ្លួនមនុស្ស៣៤នាក់ រួមមានជនជាតិចិន៣១នាក់ អ្នកមកពីតៃវ៉ាន់ម្នាក់ និងបុរសក្នុងស្រុក២នាក់។ ការស៊ើបអង្កេតបង្ហាញថា ទីតាំងនេះបានដំណើរការប្រមាណ៣ខែ ដោយក្រុមជនសង្ស័យប្រើបណ្ដាញសង្គម និងការសន្យាផ្ដល់ផលចំណេញខ្ពស់ ដើម្បីឆបោកការវិនិយោគលើជនរងគ្រោះកូរ៉េខាងត្បូង។ នៅទីតាំងនោះ អាជ្ញាធរបានដកហូតទូរស័ព្ទដៃ៣០៩គ្រឿង កុំព្យូទ័រ៤៥គ្រឿង ស្គ្រីបឆបោក និងសម្ភារៈផ្សេងៗ ដែលមានតម្លៃប្រមាណ៣១៨.៦០០រីងហ្គីត។
ក្នុងប្រតិបត្តិការ២ផ្សេងទៀត នគរបាលបានឆ្មក់ចូលវីឡាមួយនៅរមណីយដ្ឋានក្នុងតំបន់ Ayer Keroh និងសណ្ឋាគារមួយនៅ Melaka Raya ដោយឃាត់ខ្លួនមនុស្សសរុប២៩នាក់។ ទីតាំងទីមួយពាក់ព័ន្ធការឆបោកស្នេហាលើជនរងគ្រោះវៀតណាម ហើយមានជនជាតិវៀតណាម១៤នាក់ និងជនជាតិចិនម្នាក់ត្រូវបានឃាត់ខ្លួន។ ទីតាំងទីពីរសង្ស័យពាក់ព័ន្ធការឆបោកវិនិយោគក្លែងក្លាយលើពលរដ្ឋចិន ដោយមានជនសង្ស័យជនជាតិចិន១៤នាក់ត្រូវបានឃាត់ខ្លួន។
នគរបាលបានដកហូតកុំព្យូទ័រ ទូរស័ព្ទដៃ លិខិតឆ្លងដែន ស៊ីមកាត និងឧបករណ៍បណ្ដាញពីទីតាំងទាំង២។ បច្ចុប្បន្ន អ្នកពាក់ព័ន្ធត្រូវបានឃាត់ខ្លួនស្របតាមច្បាប់ ឬបញ្ជូនទៅស្ថាប័នពាក់ព័ន្ធដើម្បីស៊ើបអង្កេត។ នគរបាលកំពុងបន្តស្រាវជ្រាវអំពីរចនាសម្ព័ន្ធចាត់តាំង វិធីប្រព្រឹត្ត និងបណ្ដាញពាក់ព័ន្ធរបស់ទីតាំងឆបោកទាំងនេះ។
