ក្រុមឧទ្ទាមហ៊ូទីដែលមានអ៊ីរ៉ង់ជាខ្នងបង្អែក បានប្រកាសទទួលខុសត្រូវលើការវាយប្រហារតាមអាកាសចំនួន ៦ លើក លើព្រលានយន្តហោះ រោងចក្រប្រេង និងទីបញ្ជាការយោធាសំខាន់ៗទូទាំងប្រទេសអារ៉ាប៊ីសាអូឌីត។
យោងតាមសេចក្តីថ្លែងការណ៍របស់លោក Yahya Saree អ្នកនាំពាក្យក្រុមហ៊ូទី បានអះអាងថា ការវាយប្រហារនេះកំណត់គោលដៅលើហេដ្ឋារចនាសម្ព័ន្ធពាណិជ្ជកម្ម និងយោធាសំខាន់ៗ ចាប់ពីឆ្នេរខាងកើត ខាងលិច រហូតដល់ទីក្រុងរីយ៉ាដ ដោយក្នុងនោះរួមមាន រោងចក្រប្រេង Ras Tanura រោងចក្រប្រេង Rabigh ក្រុមហ៊ុនប្រេង Aramcoព្រលានយន្តហោះអន្តរជាតិ King Khalid ព្រលានយន្តហោះអន្តរជាតិ King Fahd និងទីបញ្ជាការយោធាអារ៉ាប៊ីសាអូឌីតក្នុងតំបន់ Najran។
ការវាយប្រហារដោយដ្រូន និងគ្រាប់មីស៊ីលទ្រង់ទ្រាយធំនេះ ធ្វើឡើងភ្លាមៗ បន្ទាប់ពីជំនួបដ៏កម្រមួយរវាងមន្ត្រីជាន់ខ្ពស់ប្រទេសអារ៉ាប៊ីសាអូឌីត និងអ៊ីរ៉ង់ នៅក្នុងទីក្រុងតេហេរ៉ង់ ដែលភាគីទាំងពីរ ទើបតែបានយល់ព្រមដោះស្រាយជម្លោះតាមការទូត។តែទោះបីជាមានការខិតខំប្រឹងប្រែងផ្នែកការទូតពីបណ្តាប្រទេសក្នុងតំបន់យ៉ាងណាក្តី ការវាយប្រហារជាបន្តបន្ទាប់នេះបានបង្ហាញថា សង្គ្រាមពាក្យសម្តី និងការប្រយុទ្ធគ្នារវាងក្រុមហ៊ូទី និងកងកម្លាំងគាំទ្រដោយប្រទេសអារ៉ាប៊ីសាអូឌីត នៅតែបន្តឡើងកម្ដៅ៕ អត្ថបទ៖ រិទ្ធី
