នៅថ្ងៃទី២៦ ខែធ្នូ គណៈកម្មាធិការទីផ្សារនិងផ្សព្វផ្សាយទេសចរណ៍កម្ពុជាបានចេញសេចក្តីជូនដំណឹង ពន្យល់ពីកិច្ចសហប្រតិបត្តិការជាមួយក្រុមហ៊ុនTrip.com Group។ សេចក្តីជូនដំណឹងថា កិច្ចព្រមព្រៀងដែលបានចុះហត្ថលេខាកន្លងមក ផ្តោតសំខាន់លើការផ្សព្វផ្សាយរូបភាពទេសចរណ៍និងគោលដៅ ដោយមានរយៈពេលពីថ្ងៃទី១ ខែកញ្ញា ឆ្នាំ២០២៥ ដល់ថ្ងៃទី៣១ ខែមីនា ឆ្នាំ២០២៦។ វាជាផ្នែកនៃការអនុវត្តការរៀបចំឆ្នាំទេសចរណ៍ចិន–កម្ពុជា២០២៥ ដែលមេដឹកនាំប្រទេសទាំងពីរបានកំណត់រួមគ្នាក្នុងខែមេសា ឆ្នាំ២០២៥ ដើម្បីពង្រឹងការផ្លាស់ប្តូរទេសចរណ៍និងការធ្វើដំណើររវាងប្រជាជន។
សេចក្តីជូនដំណឹងបញ្ជាក់ថា ដោយស្ថានភាពខាងក្រៅមានការប្រែប្រួល ភាគីទាំងពីរបានពិគ្រោះយោបល់និងសម្រេចពន្យារសកម្មភាពផ្សព្វផ្សាយដែលគ្រោងធ្វើលើវេទិកាក្រោមក្រុមហ៊ុនTrip.com ដោយរង់ចាំរហូតដល់លក្ខខណ្ឌសមស្រប។ ចំពោះកង្វល់សាធារណៈអំពីសុវត្ថិភាពទិន្នន័យទេសចរ ភាគីកម្ពុជាបញ្ជាក់ថា ក្នុងកិច្ចសហប្រតិបត្តិការនេះនិងកិច្ចសហប្រតិបត្តិការកន្លងមកទាំងអស់ ខ្លួនមិនធ្លាប់ទទួល ប្រើប្រាស់ ឬចែករំលែកព័ត៌មានផ្ទាល់ខ្លួនរបស់ទេសចរឡើយ ហើយគ្មានការប្រមូល រក្សាទុក ឬវិភាគទិន្នន័យទេ។
ទន្ទឹមគ្នា Trip.com Groupក៏បានចេញសេចក្តីថ្លែងការណ៍ឆ្លើយតបកង្វល់ពាក់ព័ន្ធ។ ក្រុមហ៊ុនថា កិច្ចព្រមព្រៀងសហប្រតិបត្តិការទីផ្សារជាមួយស្ថាប័នទេសចរណ៍ជាតិរបស់កម្ពុជាមិនពាក់ព័ន្ធនឹងកិច្ចសហប្រតិបត្តិការទិន្នន័យឡើយ។ ការផ្សព្វផ្សាយដើមឡើយគ្រោងដាក់ឱ្យដំណើរការក្រោយលក្ខខណ្ឌគោលនយោបាយអនុញ្ញាត ប៉ុន្តែត្រូវបានផ្អាកជាមុនដោយផ្អែកលើការណែនាំសុវត្ថិភាព ហើយជាក់ស្តែងមិនទាន់បានចាប់ផ្តើមទេ។ Trip.comថា ក្នុងដំណើរសហប្រតិបត្តិការទាំងមូលមិនមានបញ្ហាបែកធ្លាយភាពឯកជនអ្នកប្រើប្រាស់ទេ ហើយកិច្ចព្រមព្រៀងនិងស្ថានភាពអនុវត្តត្រូវបានដាក់ជូនស្ថាប័នពាក់ព័ន្ធពិនិត្យ។ ភាគីទាំងពីរសង្កត់ធ្ងន់ថា នឹងអនុវត្តកិច្ចសហប្រតិបត្តិការបន្ទាប់ដោយប្រុងប្រយ័ត្ន ក្រោមលក្ខខណ្ឌការពារសុវត្ថិភាពព័ត៌មាននិងសិទ្ធិអ្នកប្រើប្រាស់។
រាយការណ៍សរុបដោយស្ថានីយនេះ។
