នៅរសៀលថ្ងៃទី២ ខែមករា ក្រសួងការបរទេស និងសហប្រតិបត្តិការអន្តរជាតិកម្ពុជា បានរៀបចំសន្និសីទជម្រាបពិសេសនៅរាជធានីភ្នំពេញ អំពីស្ថានភាពព្រំដែនកម្ពុជា-ថៃបច្ចុប្បន្ន។ អ្នកនាំពាក្យក្រសួងបានជម្រាបតំណាង២៥រូប មកពីស្ថានបេសកកម្មការទូត និងអង្គការអន្តរជាតិប្រចាំកម្ពុជាចំនួន២២ អំពីការវិវត្តថ្មីៗនៅព្រំដែន និងការងារការទូតដែលកម្ពុជាបានអនុវត្តនាពេលថ្មីៗនេះ។
ការជម្រាបនេះផ្ដោតលើបីចំណុច៖
ទី១ សេចក្ដីប្រកាសរួមដែលសម្រេច និងចេញផ្សាយនៅកិច្ចប្រជុំពិសេសលើកទី៣ នៃគណៈកម្មាធិការព្រំដែនទូទៅកម្ពុជា-ថៃ (GBC) នៅថ្ងៃទី២៧ ខែធ្នូ ឆ្នាំ២០២៥។
ទី២ ការឯកភាពសំខាន់ៗពីកិច្ចប្រជុំរដ្ឋមន្ត្រីការបរទេស និងមន្ត្រីយោធាជាន់ខ្ពស់កម្ពុជា ថៃ និងចិន នៅខេត្តយូណាន ប្រទេសចិន ថ្ងៃទី២៩ ខែធ្នូ ឆ្នាំ២០២៥។
ទី៣ ស្ថានភាពពាក់ព័ន្ធនឹងការដោះលែង និងការវិលត្រឡប់មកដោយសុវត្ថិភាពរបស់យោធិនកម្ពុជា១៨រូប នៅថ្ងៃទី៣១ ខែធ្នូ ឆ្នាំ២០២៥។
អ្នកនាំពាក្យបានជម្រាបបន្ថែមដល់តំណាងចូលរួម អំពីផលប៉ះពាល់ជាក់ស្ដែងដែលភាពតានតឹងនៅព្រំដែននាពេលថ្មីៗបានបង្កដល់កម្ពុជា រួមមានជនស៊ីវិលស្លាប់ និងរបួស ប្រជាពលរដ្ឋមួយចំនួនត្រូវភៀសខ្លួន និងការខូចខាតទ្រព្យសម្បត្តិស៊ីវិលក្នុងកម្រិតផ្សេងៗ។ អ្នកនាំពាក្យបានបញ្ជាក់ថា ផលវិបាកទាំងនេះបណ្ដាលពីសកម្មភាពយោធារបស់កងកម្លាំងប្រដាប់អាវុធថៃលើដែនដីអធិបតេយ្យ និងតំបន់ជនស៊ីវិលកម្ពុជា ដែលបានប៉ះពាល់យ៉ាងធ្ងន់ធ្ងរដល់អាយុជីវិត សុវត្ថិភាព ការផលិត និងជីវភាពរស់នៅធម្មតារបស់ប្រជាជនមូលដ្ឋាន។
ចុងបញ្ចប់ អ្នកនាំពាក្យបានថ្លែងអំណរគុណដោយស្មោះចំពោះប្រទេសជាមិត្ត និងសហគមន៍អន្តរជាតិដែលផ្ដល់ជំនួយមនុស្សធម៌ដល់កម្ពុជា។ អ្នកនាំពាក្យបានសង្កត់ធ្ងន់ថា ជំនួយទាំងនេះកំពុង និងនឹងបន្តផ្ដល់ការគាំទ្រសំខាន់ដល់ប្រជាជនដែលរងផលប៉ះពាល់ពីស្ថានភាពព្រំដែន។ ជាពិសេស ជំនួយចិនតាមរយៈទ្វេភាគី ក៏ដូចជាអង្គការអន្តរជាតិ និងអង្គការមិនមែនរដ្ឋាភិបាល បានដើរតួនាទីវិជ្ជមាន និងស្ថាបនាក្នុងការបន្ធូរសម្ពាធមនុស្សធម៌ និងជួយជនភៀសសឹក។
ស្ថានីយយើងសំយោគព័ត៌មាន។
