ក្រសួងមហាផ្ទៃកម្ពុជាបានជូនដំណឹងថ្ងៃទី៤ ខែមករាថា យោធាថៃកាលពីថ្មីៗបានចូលភូមិដែលរបាយការណ៍ហៅថា ភូមិសង្គមថ្មី ក្នុងខេត្តពោធិ៍សាត់ បង្ខំបើកទ្វារផ្ទះប្រជាពលរដ្ឋ និងយកវត្ថុមានតម្លៃជាច្រើន។ របាយការណ៍ថា ទាហានបានកាត់សោនិងគាស់ទ្វារចូលផ្ទះ៨គ្រួសារ យកទ្រព្យសម្បត្តិរួមមានម៉ូតូ៤គ្រឿង និងរ៉ឺម៉កដឹកសំរាម២គ្រឿងដែលភូមិប្រើរួមគ្នា បង្កការព្រួយបារម្ភខ្លាំងដល់អ្នករស់នៅ។
ហេតុការណ៍កើតក្រោយកម្ពុជា និងថៃឯកភាពឈប់បាញ់។ តាមលទ្ធផលកិច្ចប្រជុំពិសេសគណៈកម្មាធិការព្រំដែនទូទៅ ថ្ងៃទី២៧ ធ្នូ ២០២៥ ភាគីទាំងពីរឯកភាពឈប់បាញ់ភ្លាមៗ និងឱ្យជនស៊ីវិលត្រឡប់ផ្ទះជាបន្តបន្ទាប់។ ទោះជាយ៉ាងណា ស្ថានភាពសន្តិសុខនៅតែរារាំងប្រជាជនកម្ពុជាលើស២៨ម៉ឺននាក់មិនអាចវិលទៅលំនៅឋានដើម។ ដើម្បីការពារសុវត្ថិភាពអ្នកភៀសខ្លួន អាជ្ញាធរបានបែងចែកតំបន់រងផលប៉ះពាល់ជាតំបន់ក្រហម លឿង និងសុវត្ថិភាព ដោយគ្រប់គ្រងការចេញចូលកម្រិតខុសៗគ្នា។
ក្រសួងការបរទេសកម្ពុជាក៏ចេញសេចក្ដីថ្លែងការណ៍ចោទថា ក្នុងជម្លោះ២១ថ្ងៃ យោធាថៃបានឆ្លងព្រំដែនខុសច្បាប់ និងកាន់កាប់ទីតាំង១៤កន្លែងក្នុងខេត្តកម្ពុជាចំនួន៤ ដែលជាការរំលោភអធិបតេយ្យភាពធ្ងន់ធ្ងរ។ កម្ពុជាប្រឆាំងយ៉ាងខ្លាំងបំផុត និងចាត់ទុកថាសកម្មភាពនេះរំលោភច្បាប់អន្តរជាតិ ហើយអំពាវនាវឱ្យថៃបញ្ឈប់ការរំលោភទាំងអស់ភ្លាមៗ និងគោរពការសន្យាឈប់បាញ់និងសន្តិភាពដែលបានឯកភាព។
របាយការណ៍សរុបដោយស្ថានីយនេះ
