ថ្ងៃទី៥ ខែមករា ប៉ុស្តិ៍ប៉ូលិស Khlong Nam Sai ក្នុងខេត្តស្រះកែវ ប្រទេសថៃ សហការជាមួយកងល្បាតព្រំដែន និងការិយាល័យអន្តោប្រវេសន៍ខេត្ត បានឃាត់បុរសជនជាតិចិន៣នាក់ ក្នុងប្រតិបត្តិការនៅឃុំ Khlong Nam Sai ស្រុកអារញ្ញប្រាថេត ជិតព្រំដែនកម្ពុជា។ ការស៊ើបអង្កេតបឋមរបស់ប៉ូលិសបញ្ជាក់ថា អ្នកទាំង៣ជាប់សង្ស័យចូលនិងស្នាក់នៅក្នុងប្រទេសថៃដោយគ្មានការអនុញ្ញាត។
ពេលត្រួតពិនិត្យជនសង្ស័យ ប៉ូលិសរកឃើញស៊ីមទូរស័ព្ទបរទេសចំនួន៨៦២៨សន្លឹក ដែលពួកគេយកតាមខ្លួននិងលាក់បាំង ហើយមានស្លាកសម្គាល់ថាជាស៊ីមអាម៉េរិក។ សមត្ថកិច្ចបានឃាត់ជនសង្ស័យទាំង៣ និងដកហូតវត្ថុពាក់ព័ន្ធទាំងអស់តាមច្បាប់ រួចប្រគល់ទៅប៉ូលិស Khlong Nam Sai ដើម្បីស៊ើបអង្កេតនិងចាត់ការបន្ត។ សំណុំរឿងត្រូវបានបើកក្រោមបទជនបរទេសចូលនិងស្នាក់នៅប្រទេសថៃដោយគ្មានការអនុញ្ញាត។
ប៉ូលិសភូមិភាគទី២របស់ថៃបញ្ជាក់ថា ស្ថាប័នពាក់ព័ន្ធនឹងបង្កើនកិច្ចសហការ និងបន្តបង្ក្រាបការរត់ពន្ធឧបករណ៍ទំនាក់ទំនងឆ្លងដែន និងអំពើខុសច្បាប់ផ្សេងៗ។ ប៉ូលិសថា ការលួចដឹកស៊ីមច្រើនសន្ធឹកសន្ធាប់តែងពាក់ព័ន្ធនឹងឧក្រិដ្ឋកម្មអនឡាញឆ្លងដែននិងការឆបោកតាមទូរគមនាគមន៍។ ទោះមិនទាន់បញ្ជាក់ថាករណីនេះពាក់ព័ន្ធផ្ទាល់នឹងក្រុមឆបោកក៏ដោយ ប៉ូលិសថាលក្ខណៈករណីស្របនឹងទម្រង់ឧក្រិដ្ឋកម្មឆ្លងដែន ហើយការស៊ើបអង្កេតកំពុងពង្រីកបន្ត។
រាយការណ៍សរុបដោយស្ថានីយយើង
