នៅយប់ថ្ងៃទី៨ ខែមករា ក្រសួងមហាផ្ទៃកម្ពុជាបានចេញសេចក្ដីជូនដំណឹងថា ចាប់ពីយប់ថ្ងៃទី៧ ដល់ព្រឹកព្រលឹមថ្ងៃទី៨ ខែមករា ភាគីថៃបានបញ្ជូនដ្រូនចូលដែនអាកាសអធិបតេយ្យកម្ពុជាជាច្រើនលើក សរុប២៧លើក ក្នុងនោះ២៥លើកចូលដែនអាកាសខេត្តព្រះវិហារ និង២លើកចូលខេត្តពោធិ៍សាត់។ ភាគីកម្ពុជាបានបញ្ជាក់ថា សកម្មភាពបែបនេះបានប៉ះពាល់ដល់សន្តិសុខព្រំដែន។
ការឆ្លងព្រំដែនរបស់ដ្រូនថៃនេះមិនមែនកើតឡើងជាលើកដំបូងទេ។ តាមសេចក្ដីរាយការណ៍ នៅយប់ថ្ងៃទី៥ ខែមករា ភាគីថៃបានបញ្ជូនដ្រូនស៊ើបការណ៍ចូលខេត្តពោធិ៍សាត់ ក្នុងនោះមួយគ្រឿងបានខិតជិតច្រកទ្វារព្រំដែនអន្តរជាតិចាំយាម ខេត្តកោះកុង។ នៅយប់ថ្ងៃទី៦ ខែមករា ភាគីថៃបានបញ្ជូនដ្រូនជាច្រើនគ្រឿងម្ដងទៀត រួមមានការហោះចេញពីជិតមាត់ផ្លូវជាតិលេខ៥៦ និងហោះលើតំបន់ថ្មដា ស្រុកវាលវែង ខេត្តពោធិ៍សាត់។
ស្ថាប័នពាក់ព័ន្ធកំពុងសហការយ៉ាងជិតស្និទ្ធជាមួយកងយោធពលខេមរភូមិន្ទ បន្តតាមដានស្ថានភាពសន្តិសុខព្រំដែន និងចាត់វិធានការចាំបាច់តាមច្បាប់ ដើម្បីការពារអធិបតេយ្យភាពជាតិ និងបូរណភាពទឹកដី។ ភាគីកម្ពុជាក៏បានបញ្ជាក់ជាថ្មីថា ភាគីទាំងពីរធ្លាប់បានសន្យាក្នុងកិច្ចប្រជុំពិសេសនៃគណៈកម្មាធិការព្រំដែនរួម ថានឹងជៀសវាងសកម្មភាពណាដែលបង្កើនភាពតានតឹង។ ដោយសារការវិវត្តថ្មីៗ កម្ពុជាបានហាមឃាត់ទាំងស្រុងការបង្ហោះដ្រូននៅខេត្តជាប់ព្រំដែន និងអនុញ្ញាតឱ្យយោធាប្រើប្រព័ន្ធប្រឆាំងដ្រូននៅពេលចាំបាច់ ដើម្បីឆ្លើយតបតាមច្បាប់។
របាយការណ៍សរុបរបស់ស្ថានីយយើង
