នៅថ្ងៃទី៧ ខែមករា រដ្ឋាភិបាលកម្ពុជាបានបញ្ជូនស្ថាបនិកក្រុមហ៊ុន Prince Group លោក Chen Zhi និងបក្ខពួក២នាក់ទៅប្រទេសចិន។ ក្រសួងមហាផ្ទៃបានបញ្ជាក់ថា សញ្ជាតិខ្មែររបស់ Chen ត្រូវបានដកហូតតាមច្បាប់នៅចុងឆ្នាំមុន។ មុននេះ លោកត្រូវបានសហរដ្ឋអាមេរិក និងចក្រភពអង់គ្លេសដាក់ទណ្ឌកម្ម ពីបទសង្ស័យលាងលុយកខ្វក់ទ្រង់ទ្រាយធំ និងពាក់ព័ន្ធបណ្ដាញឆបោកឆ្លងដែន ហើយយោងតាមសេចក្ដីប្រកាសក្រសួងយុត្តិធម៌អាមេរិកក្នុងខែតុលា ឆ្នាំ២០២៥ អាមេរិកបានដាក់បណ្ដឹងរដ្ឋប្បវេណីសុំរឹបអូសទ្រព្យគ្រីបតូពាក់ព័ន្ធករណី Chen ដែលពេលនោះមានតម្លៃប្រហែល១៥ពាន់លានដុល្លារ និងបានបញ្ជាក់ថា ទ្រព្យទាំងនេះស្ថិតក្រោមការគ្រប់គ្រងរបស់រដ្ឋាភិបាលអាមេរិកនៅពេលនោះ។
ពាក់ព័ន្ធនឹងករណីទាំងនេះ ធនាគារជាតិនៃកម្ពុជាបានប្រកាសថា ធនាគារ Prince Bank ចូលដំណើរការជម្រះបញ្ជី និងផ្អាកអាជីវកម្មដោយមានប្រសិទ្ធភាពភ្លាម។ អ្នកនាំពាក្យព្រឹទ្ធសភាបានបញ្ជាក់ថា បុគ្គលណាដែលព្យាយាមប្រើទំនាក់ទំនងជាមួយថ្នាក់ដឹកនាំដើម្បីបិទបាំងអំពើខុសច្បាប់ គឺជាគោលដៅអាទិភាពដែលរដ្ឋាភិបាល និងគណបក្សកាន់អំណាចត្រូវលុបបំបាត់ ហើយកម្ពុជានឹងមិនផ្ដល់ឆ័ត្រការពារដល់អំពើឧក្រិដ្ឋឡើយ។
អ្នកវិភាគបញ្ហាអន្តរជាតិយល់ថា ការបញ្ជូនចេញនេះបង្ហាញថា កម្ពុជាក្រោមការដឹកនាំរបស់នាយករដ្ឋមន្ត្រី ហ៊ុន ម៉ាណែត មានសមត្ថភាពប្រឆាំងបទល្មើសឆ្លងដែនដោយឯករាជ្យ និងឆ្លើយតបយ៉ាងមុតមាំចំពោះការសង្ស័យពីខាងក្រៅអំពីការប្ដេជ្ញាអនុវត្តច្បាប់។ បច្ចុប្បន្ន តុលាការកម្ពុជាកំពុងជំនុំជម្រះសំណុំរឿងឆបោកតាមទូរគមនាគមន៍ធំៗ៣៥ករណី ដែលពាក់ព័ន្ធជនសង្ស័យសំខាន់១៦៨នាក់ ហើយនីតិវិធីតុលាការកំពុងបន្ត។
រាយការណ៍សរុបដោយស្ថានីយនេះ។
