ភ្នំពេញ៖ កម្ពុជា និង ជប៉ុន កំពុងពិចារណាបើកដំណើរការជើងហោះហើរពិសេស (Charter Flight) តភ្ជាប់រវាងរាជធានីភ្នំពេញ និងខេត្តសៀមរាប ទៅកាន់ខេត្ត Okinawa ក្នុងគោលបំណងជំរុញកំណើនអ្នកទេសចរ និងពង្រឹងកិច្ចសហប្រតិបត្តិការសេដ្ឋកិច្ចរវាងប្រទេសទាំងពីរ។
គម្រោងនេះ ត្រូវបានលើកឡើងក្នុងជំនួបការងាររវាងលោក ស៊ីន សារ៉ាយ អនុព័ន្ធពាណិជ្ជកម្មអមស្ថានឯកអគ្គរាជទូតកម្ពុជាប្រចាំប្រទេសជប៉ុន ជាមួយលោក Tanimura Shoki ប្រធានក្រុមហ៊ុន Jumbo Tours Co., Ltd. និងលោកស្រី សត វិជ្ជរី តំណាងក្រុមហ៊ុន Magokoro Cambodia នៅខេត្តសៀមរាប កាលពីថ្ងៃទី១៣ ខែមីនា ឆ្នាំ២០២៦។
ក្នុងជំនួបនេះ ភាគីទាំងពីរបានពិភាក្សាលើការពង្រឹងកិច្ចសហប្រតិបត្តិការ ក្នុងវិស័យសំខាន់ៗ រួមមាន ទេសចរណ៍ ពាណិជ្ជកម្ម វិនិយោគ និងការអភិវឌ្ឍធនធានមនុស្ស។ ក្នុងនោះ ការបើកជើងហោះហើរពិសេសត្រូវបានចាត់ទុកថា ជាជំហានយុទ្ធសាស្ត្រសម្រាប់លើកកម្ពស់ចំនួនភ្ញៀវទេសចរទៅវិញទៅមក។
ក្រៅពីនេះ ភាគីទាំងពីរក៏បានពិភាក្សាអំពីការបន្តគាំទ្រផ្នែកអប់រំ ដោយផ្តល់អគារសិក្សា និងសម្ភារៈសិក្សា ដល់សិស្សនិស្សិតក្រីក្រ នៅខេត្តសៀមរាប ព្រមទាំងគម្រោងបង្កើតសាលាបណ្តុះបណ្តាលភាសាជប៉ុន ដើម្បីរួមចំណែកអភិវឌ្ឍធនធានមនុស្សនៅកម្ពុជា។
ជាមួយគ្នានេះ គម្រោងបើកភោជនីយដ្ឋានខ្មែរ នៅខេត្តអូគីណាវ៉ា ក៏ត្រូវបានលើកឡើង ដើម្បីផ្សព្វផ្សាយម្ហូបអាហារ និងផលិតផលខ្មែរ នៅក្នុងទីផ្សារជប៉ុនឱ្យកាន់តែទូលំទូលាយ។
តាមការបញ្ជាក់ ក្រុមហ៊ុនទាំងពីរ បានចាប់ផ្តើមសហការនាំយកផលិតផលខ្មែរ ចូលទីផ្សារជប៉ុនចាប់តាំងពីពាក់កណ្តាលឆ្នាំ២០២៥ ដោយផ្តោតលើផលិតផលដូចជា ម្រេចកំពត ជ្រក់ម្រេច និងអំបិលកំពត ដែលបច្ចុប្បន្នកំពុងត្រូវបានផ្គត់ផ្គង់ទៅកាន់ភោជនីយដ្ឋាន និងសណ្ឋាគារធំៗនៅអូគីណាវ៉ា រួមមាន Hyatt Regency Okinawa, Sheraton Okinawa Sunmarina Resort និង Hotel JAL City Naha។
បន្ថែមពីនេះ លោកអនុព័ន្ធពាណិជ្ជកម្មក៏បានចូលរួមពិព័រណ៍អន្តរជាតិ FOODEX Japan 2026 នៅ Tokyo Big Sight ដើម្បីគាំទ្រការផ្សព្វផ្សាយផលិតផលខ្មែរ និងពង្រីកបណ្តាញដៃគូពាណិជ្ជកម្មអន្តរជាតិបន្ថែម។
គម្រោងសហប្រតិបត្តិការទាំងនេះ ត្រូវបានរំពឹងថា នឹងជួយជំរុញកំណើនទេសចរណ៍ និងពាណិជ្ជកម្មទ្វេភាគីរវាង Cambodia និងជប៉ុន ឱ្យកាន់តែរឹងមាំ និងមានប្រសិទ្ធភាពខ្ពស់នាពេលខាងមុខ។ ដោយ៖ KPS99TV
