សម្តេច ហ៊ុន ម៉ាណែត អបអរការបញ្ចប់ជួសជុលប្រតិមាព្រះឥសូររាំដ៏ធំ

សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា នៅរសៀលថ្ងៃទី២០ ខែមីនា ឆ្នាំ២០២៦ បានសម្តែងការអបអរសាទរយ៉ាងកក់ក្តៅ ចំពោះការបញ្ចប់ដោយជោគជ័យនៃការជួសជុលប្រតិមាព្រះឥសូររាំដ៏ធំមួយ ដែលត្រូវបានចាត់ទុកថាជាសម្បត្តិវប្បធម៌ដ៏មានតម្លៃមួយក្នុងតំបន់អាស៊ីអាគ្នេយ៍។

ប្រតិមានេះមានកម្ពស់ប្រមាណ ៥ម៉ែត្រ ទម្ងន់ជាង ៧តោន មានព្រះភក្ត្រ ៥ និងព្រះហស្ថ ១០ ដែលជាលក្ខណៈពិសេសបង្ហាញពីសិល្បៈ និងជំនឿសាសនានៅសម័យបុរាណ។ បន្ទាប់ពីរងការបែកបាក់យ៉ាងធ្ងន់ធ្ងរ រហូតដល់ជាង ១ម៉ឺនបំណែក និងបាត់បង់ផ្នែកខ្លះក្នុងអំឡុងសង្គ្រាមស៊ីវិល ប្រតិមាដ៏អស្ចារ្យនេះ ត្រូវបានស្ដារឡើងវិញយ៉ាងប្រុងប្រយ័ត្នពីទីតាំងដើមនៅតំបន់កោះកេរ្ដិ៍។

គម្រោងជួសជុលត្រូវបានអនុវត្តអស់រយៈពេលជាង ៥ឆ្នាំ ចាប់ពីឆ្នាំ២០២០ ដល់ឆ្នាំ២០២៦ ក្រោមកិច្ចសហការរវាងអាជ្ញាធរជាតិព្រះវិហារ និងសាលាបារាំងចុងបូព៌ា (EFEO) ដោយមានការគាំទ្រពីដៃគូអន្តរជាតិផ្នែកបេតិកភណ្ឌ។ ការស្ដារឡើងវិញនេះ មិនត្រឹមតែជាការរក្សាទុកអត្តសញ្ញាណវប្បធម៌ជាតិប៉ុណ្ណោះទេ ប៉ុន្តែថែមទាំងបង្ហាញពីសមត្ថភាព និងការប្តេជ្ញាចិត្តរបស់កម្ពុជា ក្នុងការអភិរក្ស និងលើកកម្ពស់មរតកបុរាណឱ្យស្ថិតស្ថេររឹងមាំសម្រាប់ជំនាន់ក្រោយ។

ការសម្រេចបានជោគជ័យនេះ ត្រូវបានគេចាត់ទុកថាជាជំហានសំខាន់មួយ ក្នុងការជំរុញវិស័យវប្បធម៌ និងទេសចរណ៍កម្ពុជា ឱ្យកាន់តែមានភាពទាក់ទាញលើឆាកអន្តរជាតិ។

ដោយ៖ KPS99TV