នាយករដ្ឋមន្ត្រី ហ៊ុន ម៉ាណែត បានចេញសារាចរថ្ងៃទី១៩ ខែមីនា ប្រកាសវិធានសន្សំប្រេងឥន្ធនៈនិងអគ្គិសនីទូទាំងកម្ពុជា ខណៈតម្លៃប្រេងសកលបន្តកើន។ សារាចរថា ប្រេងជាថ្លៃដើមសំខាន់ក្នុងការផលិតអគ្គិសនី។ ទោះការផ្គត់ផ្គង់ប្រេងនិងអគ្គិសនីនៅអាចបំពេញតម្រូវការមូលដ្ឋាននៃសេដ្ឋកិច្ចនិងសេវាសាធារណៈ កំណើនថ្លៃដើមអាចប៉ះពាល់ចំណាយផលិតអគ្គិសនីនាពេលអនាគត ដូច្នេះរដ្ឋាភិបាលដាក់វិធានសន្សំជាមុន។
ផ្នែកប្រេងឥន្ធនៈ ក្រសួងសេដ្ឋកិច្ចនិងហិរញ្ញវត្ថុនឹងពង្រឹងការត្រួតពិនិត្យចំណាយបេសកកម្មនិងប្រេង ដើម្បីបង្កើនប្រសិទ្ធភាព។ ក្រសួងមហាផ្ទៃនឹងណែនាំអាជ្ញាធរមូលដ្ឋានឱ្យសម្រួលចរាចរណ៍ ជាពិសេសម៉ោងកកស្ទះនិងថ្ងៃឈប់សម្រាក ដើម្បីកាត់បន្ថយការខាតប្រេង។ ក្រសួងទាំងអស់ក៏ត្រូវបានស្នើឱ្យកាត់បន្ថយការប្រជុំផ្ទាល់និងការធ្វើដំណើរផ្លូវការ ហើយផ្តល់អាទិភាពការងារតាមអនឡាញ។
ផ្នែកអគ្គិសនី ក្រសួងរ៉ែនិងថាមពលនឹងរៀបចំគោលការណ៍ណែនាំសន្សំភ្លើង និងសហការជាមួយក្រសួងព័ត៌មានផ្សព្វផ្សាយ។ ស្ថាប័នរដ្ឋគ្រប់ថ្នាក់ត្រូវអនុវត្តវិធានសន្សំប្រចាំថ្ងៃ។ រាជធានីនិងខេត្តក៏នឹងសហការជាមួយអគ្គិសនីកម្ពុជា បង្កើនប្រសិទ្ធភាពភ្លើងបំភ្លឺសាធារណៈ ដើម្បីឆ្លើយតបសម្ពាធថ្លៃថាមពលកើន។
