ខេត្តក្រចេះ៖ ដើម្បីពង្រឹងសមត្ថភាពប្រកួតប្រជែង និងបង្កើនតម្លៃបន្ថែមក្នុងវិស័យទេសចរណ៍កម្ពុជា ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ បានអំពាវនាវឱ្យរដ្ឋបាលរាជធានី-ខេត្តទូទាំងប្រទេស បង្កើត «អត្តសញ្ញាណពិសេសផ្ទាល់ខ្លួន (Branding)» ដែលមានលក្ខណៈដាច់ដោយឡែក លេចធ្លោ និងខុសប្លែកពីគេ ដើម្បីទាក់ទាញភ្ញៀវទេសចរជាតិ និងអន្តរជាតិឱ្យកាន់តែច្រើន។
ការលើកឡើងនេះ បានធ្វើឡើងក្នុងសិក្ខាសាលាស្តីពី “ការអភិវឌ្ឍ និងគ្រប់គ្រងទេសចរណ៍” កាលពីថ្ងៃទី២៧ ខែមីនា ឆ្នាំ២០២៦ នៅខេត្តក្រចេះ ដែលជាផ្នែកមួយនៃការត្រៀមអបអរសាទរ «បុណ្យទន្លេ លើកទី១០ ឆ្នាំ២០២៦» ក្រោមប្រធានបទ «ទន្លេបៃតង បេតិកភណ្ឌវប្បធម៌ និងធម្មជាតិមហាសាល»។ កម្មវិធីនេះមានការចូលរួមពីឯកឧត្តម វ៉ា ថន អភិបាលខេត្តក្រចេះ តំណាងក្រសួង-ស្ថាប័ន ព្រមទាំងវិស័យឯកជន និងភាគីពាក់ព័ន្ធជាង ៥០០នាក់។
ឯកឧត្តមរដ្ឋមន្ត្រីបានបញ្ជាក់ថា ការបង្កើតអត្តសញ្ញាណទេសចរណ៍ផ្ទាល់ខ្លួនសម្រាប់ខេត្តនីមួយៗ គឺជាកត្តាសំខាន់ក្នុងការបង្កើតតម្លៃបន្ថែមខ្ពស់។ ខេត្តណាដែលអាចបង្កើតចំណុចលេចធ្លោ និងបទពិសោធន៍ដែលមិនអាចរកឃើញនៅទីកន្លែងផ្សេង នឹងក្លាយជាគោលដៅទាក់ទាញដ៏មានសក្តានុពល ធ្វើឱ្យភ្ញៀវទេសចរចង់មកទស្សនា និងស្នាក់នៅយូរជាងមុន។
ជាមួយគ្នានេះ ឯកឧត្តមក៏បានបង្ហាញពីលទ្ធផលវិស័យទេសចរណ៍ក្នុងឆ្នាំ២០២៥ ដែលកម្ពុជាទទួលបានទេសចរអន្តរជាតិប្រមាណ ៥,៥៧លាននាក់ និងទេសចរជាតិជាង ២៥,១៦លាននាក់ ក្នុងនោះ ទេសចរជាតិកើនឡើង ១១,៧% បង្កើតចំណូលបរទេសប្រមាណ ៣៨៧៨ លានដុល្លារអាម៉េរិក។ លទ្ធផលវិជ្ជមាននេះ បញ្ជាក់ពីភាពធន់នៃវិស័យទេសចរណ៍ ក្រោមបរិយាកាសសុខសន្តិភាព និងស្ថិរភាពជាតិ។
ដើម្បីបន្តលើកកម្ពស់កំណើនវិស័យនេះ ឯកឧត្តមបានជំរុញឱ្យគ្រប់ភាគីអនុវត្តតាមទិសស្លោកសំខាន់ៗ រួមមាន៖ «ទេសចរណ៍ដើម្បីទាំងអស់គ្នា ទាំងអស់គ្នាដើម្បីទេសចរណ៍», «ទេសចរណ៍រីកលូតលាស់ក្នុងសន្តិភាព» និង «បុគ្គលម្នាក់ៗ ជាអ្នកផ្សព្វផ្សាយទេសចរណ៍កម្ពុជាម្នាក់»។
គួរបញ្ជាក់ថា សិក្ខាសាលានេះក៏បានរៀបចំវេទិកាពិភាក្សាជ្រាលជ្រៅលើប្រធានបទសំខាន់២ គឺ ការអភិវឌ្ឍទេសចរណ៍ប្រកបដោយនិរន្តរភាពតាមដងទន្លេ និងការអភិវឌ្ឍខ្សែទស្សនកិច្ចភូមិភាគឦសាន។ គោលបំណងគឺលើកកម្ពស់គុណភាពសេវាកម្ម ការអភិរក្សធនធានធម្មជាតិ និងវប្បធម៌ ដើម្បីអភិវឌ្ឍខេត្តក្រចេះ និងតំបន់ភូមិភាគឦសាន ឱ្យក្លាយជាគោលដៅទេសចរណ៍បៃតងដ៏ទាក់ទាញសម្រាប់អនាគត៕ ដោយ៖ KPS99TV
