នៅថ្ងៃទី១ ខែឧសភា នាយករដ្ឋមន្ត្រីកម្ពុជា សម្តេចធិបតី ហ៊ុន ម៉ាណែត បានថ្លែងថា ក្នុងរយៈពេលជាង២ឆ្នាំចុងក្រោយ សមត្ថភាពកំពង់ផែស្វយ័តក្រុងព្រះសីហនុបានកើនពី៥៥ម៉ឺន TEUs ដល់១,៣លាន TEUs ក្នុងមួយឆ្នាំ។ ដោយឡែក សម្តេចបានលើកថា បរិមាណទំនិញឆ្លងកាត់កំពង់ផែបានកើនឡើងពីមួយឆ្នាំទៅមួយឆ្នាំ និងកោតសរសើរការខិតខំធានាប្រសិទ្ធភាពប្រតិបត្តិការ និងគុណភាពសេវាកម្ម។
សម្តេចបានលើកអាទិភាព៤ក្នុងការបន្តសហប្រតិបត្តិការជាមួយ JICA រួមមាន៖ ជំរុញគម្រោងចំណតផែកុងតឺន័រទឹកជ្រៅថ្មីជំហានទី២ និងទី៣ឱ្យសម្រេចតាមផែនការ; សិក្សារៀបចំផែនការមេដើម្បីប្រែក្លាយផែជាកំពង់ផែតំបន់ និងមជ្ឈមណ្ឌលឡូជីស្ទីក; តភ្ជាប់បណ្តាញដឹកជញ្ជូនផ្ទៃក្នុងប្រទេសមកកាន់ផែ; និងធ្វើទំនើបកម្មឌីជីថលឱ្យក្លាយជា E-Port។ ទាំងនេះជាទិសដៅសម្រាប់ការសាងសង់ និងកំណែទម្រង់បន្ត។
សម្តេចក៏បានសង្កត់ធ្ងន់លើកំណែទម្រង់ស្ថាប័ន និងការកសាងមូលធនមនុស្ស ដើម្បីបង្កើនផលិតភាពការងារ គុណភាពសេវាកម្ម និងប្រសិទ្ធភាពប្រតិបត្តិការ។ ការសិក្សាតម្រូវការធនធានមនុស្សទាំងបរិមាណនិងគុណភាព ត្រូវផ្អែកលើទំហំការងារជាក់ស្តែង ព្រមទាំងកំណត់តួនាទីភារកិច្ច ការពិពណ៌នាការងារ ការវាយតម្លៃលទ្ធផល គោលនយោបាយ ប្រព័ន្ធព័ត៌មានគ្រប់គ្រងធនធានមនុស្ស និងកែលម្អរចនាសម្ព័ន្ធមុខងារនិងការងារ។
រូបភាពកំពង់ផែសម្រាប់ជារូបតំណាង។
