ភ្នំពេញ៖ តាមសេចក្តីរាយការណ៍ដើម ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន បានអំពាវនាវ និងលើកទឹកចិត្តដល់សមាគមសារព័ត៌មានចិន និងអង្គភាពផ្សាយជាភាសាចិន បន្តពង្រឹងស្តង់ដាផ្សព្វផ្សាយប្រកបដោយវិជ្ជាជីវៈ និងការទទួលខុសត្រូវ ដើម្បីចូលរួមប្រយុទ្ធប្រឆាំងព័ត៌មានក្លែងក្លាយ និងផ្សព្វផ្សាយព័ត៌មានពិតអំពីកម្ពុជា ទៅកាន់អ្នកអាន និងអ្នកទស្សនាជនជាតិចិនឱ្យបានទូលំទូលាយ។
ការលើកឡើងនេះ ត្រូវបានធ្វើឡើងក្នុងឱកាសដែលឯកឧត្តមរដ្ឋមន្ត្រី អញ្ជើញជួបប្រជុំជាមួយសមាគមសារព័ត៌មានចិន និងអង្គភាពព័ត៌មានផ្សាយជាភាសាចិន នៅទីស្តីការក្រសួងព័ត៌មាន នាព្រឹកថ្ងៃទី៤ ខែឧសភា ឆ្នាំ២០២៦ ដើម្បីពិភាក្សាអំពីវឌ្ឍនភាព និងការពង្រឹងគុណភាពការផ្សាយព័ត៌មាននៅកម្ពុជា។
ឯកឧត្តម នេត្រ ភក្ត្រា បានបញ្ជាក់ថា កិច្ចសហប្រតិបត្តិការរវាងប្រព័ន្ធផ្សព្វផ្សាយកម្ពុជា និងចិន មានតួនាទីសំខាន់ក្នុងការលើកកម្ពស់គុណភាពព័ត៌មាន ការផ្សព្វផ្សាយប្រកបដោយតុល្យភាព និងការប្រយុទ្ធប្រឆាំងព័ត៌មានក្លែងក្លាយ ឬព័ត៌មានបំភ្លៃការពិត ដែលអាចប៉ះពាល់ដល់កេរ្តិ៍ឈ្មោះ និងបរិយាកាសវិនិយោគរបស់ប្រទេស។
កិច្ចប្រជុំក៏បានផ្តោតលើការលើកកម្ពស់ការផ្សព្វផ្សាយព័ត៌មានវិជ្ជមាន ស្តីពីសក្តានុពលទេសចរណ៍ ការវិនិយោគ និងការអភិវឌ្ឍន៍របស់កម្ពុជា ដើម្បីទាក់ទាញភ្ញៀវទេសចរ និងអ្នកវិនិយោគចិន មកកាន់ប្រទេសកម្ពុជាកាន់តែច្រើន។
ឯកឧត្តមរដ្ឋមន្ត្រី ក៏បានរំលឹកថា កន្លងមក កម្ពុជាបានរងផលប៉ះពាល់ពីព័ត៌មានក្លែងក្លាយដែលត្រូវបានបង្កើតឡើងដោយអ្នកប្រើប្រាស់បណ្ដាញសង្គមខ្លះៗ ដែលបានបំភ្លៃការពិត និងប៉ះពាល់ដល់ភាពជឿជាក់លើប្រទេស។ ដូច្នេះ អង្គភាពសារព័ត៌មានទាំងអស់ ត្រូវមានការផ្ទៀងផ្ទាត់ប្រភពព័ត៌មានឱ្យបានច្បាស់លាស់ មុនពេលផ្សាយ។
ជាមួយគ្នានេះ ឯកឧត្តមបានអំពាវនាវឱ្យសារព័ត៌មានភាសាចិន បន្តផ្សព្វផ្សាយព័ត៌មានប្រកបដោយតុល្យភាព មានប្រភពច្បាស់លាស់ និងគ្រប់ជ្រុងជ្រោយ ដើម្បីបង្កើនការយល់ដឹង ស្ដារជំនឿទុកចិត្តលើសារព័ត៌មាន និងពង្រឹងទំនាក់ទំនងមិត្តភាពរវាងប្រជាជនកម្ពុជា-ចិន ឱ្យកាន់តែរឹងមាំបន្ថែមទៀត៕ ដោយ៖ សុខ ស៊ីណាន
