ក្រពើភ្នំពូជសុទ្ធ១០ក្បាលគ្រោងលែងក្នុងទន្លេស្រែពកនៅថ្ងៃទី២២ ខែឧសភា ឆ្នាំ២០២៦

ក្រពើភ្នំពូជសុទ្ធចំនួន ១០ក្បាល នឹងត្រូវលែងចូលទៅក្នុងទន្លេស្រែពក នាថ្ងៃទី២២ ខែឧសភា ឆ្នាំ២០២៦ ដែលជាជំហានដ៏សំខាន់មួយក្នុងកិច្ចខិតខំប្រឹងប្រែងរបស់កម្ពុជា ដើម្បីស្តារប្រភេទក្រពើជិតផុតពូជបំផុតមួយនៅលើពិភពលោក និងពង្រឹងការអភិរក្សប្រព័ន្ធអេកូឡូស៊ីទឹកសាប នៅតំបន់ទេសភាពខ្ពង់រាបភាគឦសាន។
អង្គការ WWF-Cambodia សហការជាមួយ ក្រសួងបរិស្ថាន ក្រសួងកសិកម្ម រុក្ខាប្រមាញ់ និងនេសាទ រដ្ឋបាលខេត្តមណ្ឌលគីរី និងអង្គការ Fauna & Flora International សូមជូនដំណឹងថា ការលែងក្រពើភ្នំពូជសុទ្ធ (Crocodylus siamensis) ទាំង១០ក្បាលនេះ នឹងធ្វើឡើងនៅក្នុងទន្លេស្រែពក ស្ថិតក្នុង ដែនជម្រកសត្វព្រៃស្រែពក។
ការលែងក្រពើភ្នំលើកនេះ ធ្វើឡើងបន្ទាប់ពីដំណើរការពិគ្រោះយោបល់ និងទទួលបានការយល់ព្រមពីភាគីពាក់ព័ន្ធគ្រប់កម្រិត រួមទាំងសហគមន៍ជនជាតិដើមភាគតិច និងសហគមន៍មូលដ្ឋានផងដែរ៕ ដោយ៖ ប៉ៃ សុឃីម