សម្តេចធិបតីបដិសេធសំណើផ្ទេរសេវារថយន្តក្រុងសាធារណៈភ្នំពេញឱ្យក្រុមហ៊ុនឯកជន

នាយករដ្ឋមន្រ្តីកម្ពុជា សម្តេចធិបតី ហ៊ុន ម៉ាណែត បានថ្លែងថា មានក្រុមហ៊ុនឯកជនជាច្រើនចង់មកដេញថ្លៃសេវារថយន្តក្រុងសាធារណៈក្នុងរាជធានីភ្នំពេញ។ ប៉ុន្តែសំណើសុំដេញថ្លៃនេះ ត្រូវបានសម្តេចធិបតីបដិសេធព្រោះបារម្ភខ្លាចក្រុមហ៊ុនឯកជនដំឡើងតម្លៃសំបុត្រដើម្បីយកចំណេញលើប្រជាពលរដ្ឋ និងសិស្សសាលា។ សម្តេចក៏បានបារម្ភថា នៅពេលដែលរដ្ឋចាំបាច់ឱ្យពលរដ្ឋជិះហ្វ្រី (Free) សិស្សសាលាជិះហ្វ្រី (Free) ប៉ុន្តែក្រុមហ៊ុនឯកជនមិនអាចធ្វើបាន។ ដូច្នេះ សេវាសាធារណៈមួយចំនួនត្រូវតែរដ្ឋជាអ្នកគ្រប់គ្រង។ សម្តេចធិបតីថ្លែងដូច្នេះនៅក្នុងពិធីសម្ពោធដាក់ឱ្យប្រើប្រាស់ជាផ្លូវការ អគារទីស្នាក់ការកណ្តាលនៃអគ្គនាយកដ្ឋានពន្ធដារ នៅព្រឹកថ្ងៃព្រហស្បតិ៍ ទី២១ ខែឧសភានេះ។ 

ដោយ៖ ង៉ែត ពិសាន្ត