ដកអាជ្ញាបណ្ណកាស៊ីណូ១នៅក្រុងប៉ោយប៉ែតក្រោយរកឃើញពាក់ព័ន្ធឆបោកតាមអនឡាញនិងការធ្វើទារុណកម្ម

គណៈកម្មការគ្រប់គ្រងល្បែងពាណិជ្ជកម្មកម្ពុជា បានដកហូតអាជ្ញាប័ណ្ណកាស៊ីណូដែលមានឈ្មោះ ខេអឹមអេច ផារាដាយ ថៅវើ កាស៊ីណូ និងសណ្ឋាគារ នៅសង្កាត់អូរជ្រៅ ក្រុងប៉ោយប៉ែត ខេត្តបន្ទាយមានជ័យ។ តាមសេចក្តីប្រកាសរបស់គណៈកម្មការ សមត្ថកិច្ចរកឃើញសកម្មភាពពាក់ព័ន្ធការឆបោកតាមប្រព័ន្ធបច្ចេកវិទ្យា ការធ្វើទារុណកម្ម និងការរក្សាទុកអាវុធខុសច្បាប់ នៅទីតាំងនោះ កាលពីថ្ងៃទី៧ ខែឧសភា។ ជនសង្ស័យ៧នាក់ត្រូវបានឃាត់ខ្លួន រួមជាមួយទូរសព្ទ និងកុំព្យូទ័រជាច្រើនគ្រឿង។

រាជរដ្ឋាភិបាលកម្ពុជា បានកំណត់យកការប្រយុទ្ធប្រឆាំងនឹងការឆបោកតាមប្រព័ន្ធបច្ចេកវិទ្យា (Online Scams) ជាអាទិភាពខ្ពស់មួយពាក់ព័ន្ធដោយផ្ទាល់ទៅនឹងសន្ថិសុខសង្គម សុវត្ថិភាពប្រជាពលរដ្ឋ និងកិត្តិយសជាតិលើឆាកអន្តរជាតិ។

តាមសេចក្តីប្រកាសរបស់គណៈកម្មការគ្រប់គ្រងល្បែងពាណិជ្ជកម្មកម្ពុជា ការដកហូតអាជ្ញាប័ណ្ណកាស៊ីណូនេះ ផ្អែកលើលទ្ធផលស៊ើបអង្កេត និងការត្រួតពិនិត្យឧបករណ៍អេឡិចត្រូនិករបស់នាយកដ្ឋានប្រឆាំងបទល្មើសបច្ចេកវិទ្យា និងនាយកដ្ឋានប្រឆាំងបទល្មើសល្បែងពាណិជ្ជកម្ម និងសេចក្តីសម្រេចចុះថ្ងៃទី២២ ខែឧសភា ឆ្នាំ២០២៦។

ដោយ៖ ង៉ែត ពិសាន្ត