នាយករដ្ឋមន្ត្រីកម្ពុជា សម្តេចធិបតី ហ៊ុន ម៉ាណែត បានបដិសេធជាសាធារណៈចំពោះការលើកឡើងរបស់អ្នកប្រើអ៊ីនធឺណិតថៃមួយចំនួនថា សម្តេចប្រើកូតាយោធាថៃដើម្បីទៅរៀននៅបណ្ឌិតសភាយោធាសហរដ្ឋអាមេរិក West Point។
ក្នុងសារចុះថ្ងៃទី៣០ ខែឧសភា បន្ទាប់ពីសាររំលឹកខួប២៧ឆ្នាំនៃការបញ្ចប់ការសិក្សា សម្តេចបានលើកឡើងថា ការអះអាងនេះកើតមានជាច្រើនលើកហើយ។ សម្តេចថា មិនបានប្រើកូតាថៃទេ ហើយចង់ពន្យល់អំពីផ្លូវដែលសម្តេចបានចូលរៀន។
សម្តេចបានបញ្ជាក់ថា សហរដ្ឋអាមេរិកជាអ្នកកំណត់កូតាដោយផ្ទាល់ដល់ប្រទេសនីមួយៗ ហើយប្រទេសទាំងនោះមិនអាចផ្ទេរកូតាឱ្យគ្នាបានទេ។
សម្តេចបានបញ្ជាក់ថា នៅពេលចូលរៀនឆ្នាំ១៩៩៥ សម្តេចទទួលបានការធានាពីក្រសួងការពារជាតិកម្ពុជា និងការគាំទ្រពីស្ថានឯកអគ្គរដ្ឋទូតអាមេរិកប្រចាំកម្ពុជា។ សម្តេចក៏បានលើកឡើងថា សញ្ញាបត្របញ្ជាក់ថាសម្តេចជានិស្សិតយោធាពីកម្ពុជា ដែលសម្តេចយកជាមូលដ្ឋានក្នុងការបដិសេធការអះអាងនោះ។
សម្តេចថា អ្នកដែលចង់ស្វែងរកការបញ្ជាក់បន្ថែមអាចសួរក្រសួងការពារជាតិថៃ ស្ថានឯកអគ្គរដ្ឋទូតអាមេរិកប្រចាំថៃ ឬសាលា West Point ថាតើធ្លាប់មានករណីនិស្សិតកម្ពុជាចូលរៀនជំនួសបេក្ខជនថៃដែរឬទេ។
សម្តេចធិបតីបានសម្តែងក្តីសង្ឃឹមថា ការពន្យល់នេះនឹងជួយបញ្ចប់ការយល់ខុស។
