ការប្រារព្ធទិវាកុមារអន្តរជាតិ ត្រូវបានរៀបចំឡើងដើម្បីរំលឹកដល់សារៈសំខាន់នៃការអនុវត្តសិទ្ធិជាមូលដ្ឋានរបស់កុមារ និងបង្ហាញពីការយកចិត្តទុកដាក់របស់រាជរដ្ឋាភិបាលក្នុងការលើកកម្ពស់សុខុមាលភាព និងការពារកុមារ។ ជាពិសេស ការបង្ការ ទប់ស្កាត់ និងឆ្លើយតបចំពោះអំពើហិង្សាលើកុមារ ពលកម្មកុមារ និងហានិភ័យនានាតាមប្រព័ន្ធអនឡាញ ព្រមទាំងការគាំទ្រកុមាររងគ្រោះ និងកុមារងាយរងគ្រោះពីការគំរាមកំហែង ការកេងប្រវ័ញ្ច និងការរំលោភបំពានគ្រប់ទម្រង់ ឱ្យទទួលបានការជួយអន្តរាគមន៍ទាន់ពេលវេលា និងមានប្រសិទ្ធភាព។
ជាការពិត កុមារគឺជាធនធានមនុស្សដ៏មានតម្លៃ និងជាកម្លាំងស្នូលសម្រាប់អនាគតប្រទេសជាតិ។ ស្របតាមយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាល ដែលបានកំណត់យក «មនុស្ស» ជាវិស័យអាទិភាពចម្បង ការវិនិយោគលើសុខភាព ការអប់រំ សុវត្ថិភាព និងការអភិវឌ្ឍកុមារនាពេលបច្ចុប្បន្ន គឺជាការកសាងមូលដ្ឋានគ្រឹះដ៏រឹងមាំសម្រាប់មូលធនមនុស្សប្រកបដោយសក្តានុពល ដើម្បីជំរុញការអភិវឌ្ឍកម្ពុជា ឱ្យកាន់តែរីកចម្រើន វិបុលភាព និងរុងរឿងនាពេលអនាគត។ កុមារថ្ងៃនេះ គឺជាអ្នកដឹកនាំ និងកម្លាំងអភិវឌ្ឍជាតិថ្ងៃអនាគត៕ ដោយ៖ ប៉ៃ សុឃីម
