លោកបណ្ឌិត គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជា បានលើកឡើងថា បណ្ដាញសង្គមជាពិសេសហ្វេសប៊ុក ប្រៀបដូចជាអាវុធមុខពីរ ៖
ពីជ្រុងអវិជ្ជមាន, បណ្ដាញសង្គមអាចបង្កភាពវឹកវរឬបំពុលសង្គមតាមរយៈព័ត៌មានក្លែងក្លាយឬសាច់រឿងប្រឌិតផ្សេងៗ រំខានដល់កិច្ចប្រតិបត្តិការច្បាប់របស់អាជ្ញាធរមានសមត្ថកិច្ចតាមរយៈការដើរតួជាតុលាការមហាជនដែលកាត់ក្ដីដោយអារម្មណ៍ គ្មាននីតិវិធី គ្មានការស្រាវជ្រាវ និងខ្វះភស្តុតាងគ្រប់ជ្រុងជ្រោយ និងជាមធ្យោបាយដែលជនទុច្ចរិតប្រើប្រាស់ដើម្បីសម្លុត គំរាម និងឆបោក ទាញយកផលប្រយោជន៍ផ្ទាល់ខ្លួន។
ពីជ្រុងវិជ្ជមាន, បណ្ដាញសង្គមជាទីកន្លែងចែករំលែកព័ត៌មាននិងចំណេះដឹង ចាត់ចែងការងារ ដោះដូរពាណិជ្ជកម្ម ពង្រីកបណ្ដាញទំនាក់ទំនង ជាអ្នកជូតទឹកភ្នែកជូនប្រជាពលរដ្ឋស្លូតត្រង់និងទន់ខ្សោយដែលគ្មានសំឡេង និងដើរតួនាទីជាស្ពានចម្លងការពិតពីប្រជាពលរដ្ឋទៅកាន់ថ្នាក់ដឹកនាំកំពូលដោយរំលងរបាយការណ៍លាបពណ៌ ភូតភរ និងបិទបាំងការពិតរបស់មន្ត្រីផ្លែទុរេន។
លោកបណ្ឌិតបន្ថែមថា ហេតុដូច្នេះផលប្រយោជន៍ឬគ្រោះថ្នាក់នៃបណ្ដាញសង្គម គឺអាស្រ័យទៅលើរបៀបនៃការប្រើប្រាស់និងប្រសិទ្ធភាពនៃការគ្រប់គ្រង។ ក្នុងន័យនេះ សូមបងប្អូនមេត្តាប្រើប្រាស់បណ្ដាញសង្គមប្រកបដោយមនសិការ វិចារណញាណ និងការទទួលខុសត្រូវខ្ពស់ ដើម្បីជាប្រយោជន៍ផ្ទាល់ខ្លួនផង និងសង្គមផង តែសូមកុំបំពុលសង្គម ដើម្បីតែផលប្រយោជន៍ផ្ទាល់ខ្លួន៕
ដោយ៖ ឡាយ កុល
