ខេត្តកណ្តាល៖ សម្តេចអគ្គមហាសេនាបតីតេជោ ហ៊ុន សែន ប្រមុខរដ្ឋស្តីទីនៃព្រះរាជាណាចក្រកម្ពុជា បានក្រើនរំលឹកដល់មន្ត្រីរាជការគ្រប់លំដាប់ថ្នាក់ទូទាំងខេត្តកណ្តាល ឱ្យបន្តលើកកម្ពស់ស្មារតីទទួលខុសត្រូវក្នុងការបំពេញតួនាទីបម្រើជាតិ និងប្រជាពលរដ្ឋ ដោយផ្តោតលើការផ្តល់សេវាសាធារណៈឱ្យបានទាន់ពេលវេលា មានប្រសិទ្ធភាព និងឆ្លើយតបតម្រូវការជាក់ស្តែងរបស់ប្រជាពលរដ្ឋ។
ការថ្លែងបែបនេះធ្វើឡើងក្នុងឱកាសដែលសម្តេចតេជោ អញ្ជើញជួបសំណេះសំណាលជាមួយសមាជិកក្រុមប្រឹក្សាខេត្ត ក្រុង ស្រុក ឃុំ សង្កាត់ និងថ្នាក់ដឹកនាំមន្ទីរ-អង្គភាពនានាជុំវិញខេត្តកណ្តាល សរុបចំនួន ១,៥៦៨នាក់ នៅថ្ងៃទី៦ ខែមិថុនា ឆ្នាំ២០២៦។
តាមរយៈ ឯកឧត្តម ជា ធីរិទ្ធ អ្នកនាំពាក្យសម្តេចតេជោ បានឱ្យដឹងថា សម្តេចបានសម្តែងនូវក្តីរីករាយចំពោះការវិលត្រឡប់មកជួបជាមួយថ្នាក់ដឹកនាំ និងមន្ត្រីរាជការនៅខេត្តកណ្តាលសារជាថ្មី ព្រមទាំងបានកោតសរសើរចំពោះកិច្ចខិតខំប្រឹងប្រែងរបស់មន្ត្រីគ្រប់ជាន់ថ្នាក់ ដែលបានបំពេញការងារបម្រើសាធារណជន និងចូលរួមអភិវឌ្ឍមូលដ្ឋានឱ្យមានការរីកចម្រើនជាបន្តបន្ទាប់។
សម្តេចតេជោបានសង្កត់ធ្ងន់ថា មន្ត្រីរាជការគ្រប់រូប ត្រូវបន្តខិតខំផ្តល់សេវាតម្រូវការ និងសេវាចាំបាច់ផ្សេងៗជូនប្រជាពលរដ្ឋឱ្យបានឆាប់រហ័ស ប្រកបដោយគុណភាព និងតម្លាភាព។ ជាពិសេស ក្រុមប្រឹក្សាឃុំ-សង្កាត់ ដែលជាអាជ្ញាធរនៅជិតប្រជាពលរដ្ឋជាងគេ ត្រូវយកចិត្តទុកដាក់ដោះស្រាយបញ្ហា និងបម្រើសេចក្តីត្រូវការរបស់ប្រជាពលរដ្ឋដោយស្មារតីទទួលខុសត្រូវខ្ពស់។
ទន្ទឹមនឹងនេះ សម្តេចក៏បានគាំទ្រការពង្រឹងប្រសិទ្ធភាពនៃការប្រមូលចំណូលជាតិ តាមរយៈការគ្រប់គ្រងពន្ធដារ និងពន្ធគយឱ្យកាន់តែមានប្រសិទ្ធភាព ព្រមទាំងជំរុញការទប់ស្កាត់សកម្មភាពគេចវេះពន្ធ និងការធ្វើអាជីវកម្មមិនគោរពកាតព្វកិច្ចពន្ធ ដើម្បីធានាការបង្កើនចំណូលសម្រាប់ការអភិវឌ្ឍប្រទេស។
ពាក់ព័ន្ធនឹងសន្តិសុខសង្គម សម្តេចតេជោបានណែនាំឱ្យមន្ត្រី និងអាជ្ញាធរគ្រប់លំដាប់ថ្នាក់ បន្តយកចិត្តទុកដាក់ថែរក្សាស្ថិរភាព សន្តិសុខ និងសណ្តាប់ធ្នាប់សាធារណៈ តាមរយៈការអនុវត្តគោលនយោបាយ «ភូមិ ឃុំ សង្កាត់ មានសុវត្ថិភាព» ដោយផ្តោតលើការបង្ការ និងបង្ក្រាបបទល្មើសគ្រប់ប្រភេទ រួមទាំងអំពើចោរកម្ម គ្រឿងញៀន និងបទល្មើសបច្ចេកវិទ្យា។
ជាមួយគ្នានេះ សម្តេចបានរំលឹកថា មន្ត្រីរាជការត្រូវជៀសវាងភាពអសកម្ម ការប្រើអំណាចមិនត្រឹមត្រូវ ឬការគៀបសង្កត់ប្រជាពលរដ្ឋ ហើយត្រូវចងចាំជានិច្ចថា មន្ត្រីរាជការមិនមែនជាចៅហ្វាយរបស់ប្រជាពលរដ្ឋនោះទេ ប៉ុន្តែជាអ្នកបម្រើដ៏ស្មោះត្រង់របស់ប្រជាពលរដ្ឋ។
សម្តេចតេជោក៏បានណែនាំដល់អាជ្ញាធរខេត្តកណ្តាលឱ្យបន្តពង្រឹងកិច្ចសហប្រតិបត្តិការជាមួយបណ្តាខេត្តជាប់ព្រំដែននៃប្រទេសវៀតណាម ដើម្បីជំរុញការអភិវឌ្ឍលើវិស័យសេដ្ឋកិច្ច ពាណិជ្ជកម្ម និងការផ្លាស់ប្តូរទំនាក់ទំនងរវាងប្រជាជន និងប្រជាជនឱ្យកាន់តែរឹងមាំ។
ក្នុងឱកាសនោះ សម្តេចតេជោ ហ៊ុន សែន បានកោតសរសើរចំពោះសមិទ្ធផល និងការរួមចំណែករបស់មន្ត្រីគ្រប់ជាន់ថ្នាក់ក្នុងការអភិវឌ្ឍខេត្តកណ្តាលឱ្យមានការរីកចម្រើនជាបន្តបន្ទាប់ និងបានជូនពរឱ្យមន្ត្រីរាជការទាំងអស់ទទួលបានសុខភាពល្អ សុភមង្គល និងជោគជ័យក្នុងការបំពេញភារកិច្ចបម្រើជាតិ និងប្រជាជន។ ដោយ៖ សុខ ស៊ីណាន
