កម្មវិធីកិច្ចពិភាក្សាទេសចរណ៍អាស៊ីក្រោមប្រធានបទ “AI+Web4” បានបើកដំណើរការជាផ្លូវការនៅសណ្ឋាគារ Sofitel Phnom Penh ដោយមានការចូលរួមពីថ្នាក់ដឹកនាំក្នុងវិស័យបច្ចេកវិទ្យា សហគ្រិន និងយុវជនជាច្រើន ដើម្បីពិភាក្សាអំពីនិន្នាការថ្មីៗនៃបញ្ញាសិប្បនិម្មិត (AI) និងការអភិវឌ្ឍឌីជីថល។
អ្នករៀបចំកម្មវិធីបានបញ្ជាក់ថា ព្រឹត្តិការណ៍នេះមិនត្រឹមផ្តោតលើភាពស្រស់ស្អាតប៉ុណ្ណោះទេ ប៉ុន្តែផ្តោតលើការពង្រឹងសមត្ថភាព សហគ្រិនភាព និងការអភិវឌ្ឍខ្លួនរបស់ស្ត្រី ដើម្បីឱ្យពួកគេអាចទាញយកប្រយោជន៍ពីបច្ចេកវិទ្យា AI ក្នុងការបង្កើតអាជីវកម្ម និងបង្កើនឱកាសសេដ្ឋកិច្ច។
ក្នុងអំឡុងកម្មវិធីខាងមុខ នឹងមានការចែករំលែកចំណេះដឹង និងពិភាក្សាលើប្រធានបទសំខាន់ៗ ដូចជា នវានុវត្តន៍ សហគ្រិនភាព និងការអនុវត្ត AI ក្នុងអាជីវកម្ម។ កម្មវិធីនេះមានគោលបំណងបង្កើតវេទិកាសម្រាប់ការរៀនសូត្រ ការភ្ជាប់បណ្តាញទំនាក់ទំនង និងការអភិវឌ្ឍសមត្ថភាពរបស់យុវជន និងស្ត្រីក្នុងយុគសម័យឌីជីថល។
បន្ទាប់ពីការបើកដំណើរការដោយជោគជ័យនៅភ្នំពេញ កម្មវិធី “AI+Web4” គ្រោងនឹងបន្តរៀបចំនៅបណ្តាប្រទេសផ្សេងៗ ដើម្បីជំរុញកិច្ចសហប្រតិបត្តិការ និងការអភិវឌ្ឍរួមក្នុងវិស័យបច្ចេកវិទ្យា និងសហគ្រិនភាព៕
ដោយ៖ ប៉ៃ សុឃីម
រូបភាព៖ កែវ ដារ៉ា
