នៅថ្ងៃទី២២ ខែមិថុនា ពិធីបើកការដឹកជញ្ជូនកសិផលកម្ពុជាឆ្លងកាត់ឡាវទៅចិន បានធ្វើឡើងនៅទីក្រុងវៀងចន្ទន៍ ប្រទេសឡាវ ដោយមានមន្ត្រីជាន់ខ្ពស់វិស័យកសិកម្មនិងព្រៃឈើកម្ពុជា–ឡាវ និងតំណាងសហគ្រាសកសិកម្មកម្ពុជា៣០ចូលរួម។ របាយការណ៍ពណ៌នាថា ការបើកផ្លូវថ្មីជាលទ្ធផលសំខាន់នៃការពិគ្រោះនិងសម្របសម្រួលរវាងកម្ពុជានិងឡាវ។ ភាគីទាំងពីរបានបើកច្រកឆ្លងកាត់ថ្មី និងកែលម្អនីតិវិធីគយ ចត្តាឡីស័ក និងភស្តុភារឆ្លងដែន ដើម្បីសម្រួលការនាំផលិតផលកសិកម្មកម្ពុជា៦ប្រភេទទៅចិន រួមមានចេក ស្វាយ ទុរេន អង្ករ មៀនប៉ៃលិន និងម្សៅដំឡូងមី ព្រមទាំងបង្កើនប្រសិទ្ធភាពដឹកជញ្ជូន។ ក្រសួងកសិកម្ម រុក្ខាប្រមាញ់ និងនេសាទកម្ពុជាបានវាយតម្លៃខ្ពស់ចំពោះផ្លូវនេះ ដោយហៅថាជាសមិទ្ធផលសំខាន់នៃកិច្ចសហប្រតិបត្តិការតំបន់។ ផ្លូវនេះផ្តល់ច្រកថ្មីសម្រាប់កសិផលកម្ពុជាចូលទីផ្សារចិនប្រកបដោយស្ថិរភាព និងជួយពង្រីកទីផ្សារនិងសមត្ថភាពប្រកួតប្រជែង។ ភាគីនានារំពឹងថា នឹងធ្វើឱ្យកិច្ចសហប្រតិបត្តិការកសិកម្ម សេដ្ឋកិច្ច និងពាណិជ្ជកម្មកម្ពុជា–ឡាវ–ចិនកាន់តែស៊ីជម្រៅ និងផ្តល់ប្រយោជន៍ដល់អ្នកប្រកបរបរតាមផ្លូវ ដើម្បីការអភិវឌ្ឍរួម។
