គណៈកម្មាធិការជាតិគ្រប់គ្រងគ្រោះមហន្តរាយ ដឹកនាំដោយឯកឧត្តមកិត្តិសង្គហបណ្ឌិត គន់ គីម ទេសរដ្ឋមន្ត្រី និងអនុប្រធានទី១ បានជំរុញឱ្យអាជ្ញាធរខេត្តព្រះវិហារ បន្តតាមដាន និងត្រៀមឆ្លើយតបចំពោះគ្រោះមហន្តរាយដោយជំនន់ទឹកភ្លៀង ដែលបង្កផលប៉ះពាល់ជាបណ្តោះអាសន្នដល់លំនៅដ្ឋាន និងជីវភាពរស់នៅរបស់ប្រជាពលរដ្ឋ។
តាមរបាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយ បានឱ្យដឹងថា នៅយប់ថ្ងៃទី២៩ ខែមិថុនា ឆ្នាំ២០២៦ មានភ្លៀងធ្លាក់យ៉ាងខ្លាំងនៅតំបន់ភូមិតាកឹងបៃតង ក្នុងភូមិសាស្ត្រខេត្តព្រះវិហារ បណ្តាលឱ្យទឹកហូរមិនទាន់ និងជន់លិចលំនៅដ្ឋានប្រជាពលរដ្ឋមួយចំនួន។
ក្រោយទទួលបានព័ត៌មាន ក្រុមការងារគ្រប់គ្រងគ្រោះមហន្តរាយ ដោយសហការជាមួយកងវិស្វកម្មតេជោសែនសៀមរាប រដ្ឋបាលខេត្ត និងមន្ទីរពាក់ព័ន្ធ បានចុះអន្តរាគមន៍ភ្លាមៗ ដោយធ្វើការកាយផ្តាច់ផ្លូវមួយចំនួន ដើម្បីបញ្ចៀស និងបង្ហូរមុខទឹកចេញពីតំបន់រងផលប៉ះពាល់។
ក្រោយប្រតិបត្តិការបង្ហូរទឹកអស់រយៈពេលប្រមាណ៣ម៉ោង ទឹកបានស្រកចេញពីលំនៅដ្ឋានប្រជាពលរដ្ឋវិញជាស្ថាពរ។
ក្នុងឱកាសនោះ ឯកឧត្តមកិត្តិសង្គហបណ្ឌិត គន់ គីម ក្នុងនាមគណៈកម្មាធិការជាតិគ្រប់គ្រងគ្រោះមហន្តរាយ បានថ្លែងកោតសរសើរ និងវាយតម្លៃខ្ពស់ចំពោះកិច្ចសហការរបស់ក្រុមការងារសង្គ្រោះ និងអាជ្ញាធរពាក់ព័ន្ធ ដែលបានជួយអន្តរាគមន៍ និងដោះស្រាយស្ថានការណ៍ជំនន់ទឹកភ្លៀងបានទាន់ពេលវេលា៕
ដោយ៖ ប៉ៃ សុឃីម
