អាជ្ញាធរមីន បានចេញសេចក្តីណែនាំ ស្តីពីការពង្រឹងវិធានការបង្ការ និងទប់ស្កាត់គ្រោះថ្នាក់ដែលបណ្តាលមកពីយុទ្ធភណ្ឌគ្រឿងផ្ទុះ រួមមាន មីន គ្រាប់បែកចង្កោម និងសំណល់ជាតិផ្ទុះពីសង្គ្រាម ក្នុងអំឡុងពេល និងក្រោយពេលកើតមានគ្រោះទឹកជំនន់។
អាជ្ញាធរមីន បានអំពាវនាវឱ្យប្រជាពលរដ្ឋមានការប្រុងប្រយ័ត្នខ្ពស់ មិនត្រូវប៉ះពាល់ ឬរើសវត្ថុសង្ស័យដែលអាចជាយុទ្ធភណ្ឌគ្រឿងផ្ទុះ និងត្រូវរាយការណ៍ជាបន្ទាន់ទៅអាជ្ញាធរមូលដ្ឋាន ឬអង្គភាពជំនាញ ដើម្បីចាត់វិធានការដោះស្រាយប្រកបដោយសុវត្ថិភាព។
សេចក្តីណែនាំនេះ មានគោលបំណងការពារអាយុជីវិត និងទ្រព្យសម្បត្តិរបស់ប្រជាពលរដ្ឋ ខណៈទឹកជំនន់អាចបណ្តាលឱ្យមីន និងសំណល់ជាតិផ្ទុះផ្លាស់ទីពីទីតាំងដើម បង្កើនហានិភ័យគ្រោះថ្នាក់ដល់សហគមន៍៕
ដោយ៖ ប៉ៃ សុឃីម
