អ្នករត់ជាង៦៥០០នាក់ ចូលរួមម៉ារ៉ាតុងចក្រភពអង្គរលើកទី១១ ក្នុងនោះអ្នកចូលរួមពីចិនជាង២០០នាក់

នាព្រឹកថ្ងៃទី២ ខែសីហា ព្រឹត្តិការណ៍រត់ប្រណាំងម៉ារ៉ាតុងអន្តរជាតិចក្រភពអង្គរលើកទី១១ បានប្រព្រឹត្តទៅនៅខេត្តសៀមរាប ប្រទេសកម្ពុជា ដោយមានអ្នករត់ជាតិ និងអន្តរជាតិជាង៦៥០០នាក់ មកពី៥១ប្រទេសនិងតំបន់ ប្រមូលផ្តុំគ្នានៅតំបន់អង្គរ។ ចំនួនអ្នកចូលរួមកើនឡើងប្រមាណ២៥% បើធៀបនឹងលើកមុន និងជាចំនួនខ្ពស់បំផុតចាប់តាំងពីមានព្រឹត្តិការណ៍នេះ។
លោក ថោង ខុន ទេសរដ្ឋមន្ត្រី និងជាប្រធានគណៈកម្មាធិការជាតិអូឡាំពិកកម្ពុជា បានអញ្ជើញចូលរួមពិធីបើក និងគាំទ្រព្រឹត្តិការណ៍នេះ។ លោក Wang Wenbin ឯកអគ្គរដ្ឋទូតចិនប្រចាំកម្ពុជា និងភ្ញៀវកិត្តិយសជាច្រើនរូបក៏បានអញ្ជើញចូលរួមផងដែរ។
ក្រោយបញ្ចប់ព្រឹត្តិការណ៍ លោក Wang Wenbin បានបង្ហោះសារនៅលើបណ្តាញសង្គម ដោយអបអរសាទរចំពោះការរៀបចំព្រឹត្តិការណ៍ប្រកបដោយជោគជ័យ។ លោកបានលើកឡើងថា មានអ្នកចូលរួមជាង៦៥០០នាក់ ដែលជាចំនួនខ្ពស់បំផុតក្នុងប្រវត្តិព្រឹត្តិការណ៍នេះ។ ក្នុងនោះ អ្នកចូលរួមមកពីប្រទេសចិនមានជាង២០០នាក់ ដែលជាចំនួនច្រើនជាងគេក្នុងចំណោមប្រទេសក្រៅពីកម្ពុជា ហើយឆ្លុះបញ្ចាំងពីលទ្ធផលវិជ្ជមាននៃការផ្លាស់ប្តូររវាងប្រជាជន និងកិច្ចសហប្រតិបត្តិការកីឡារបស់ប្រទេសទាំងពីរ។
លោក Wang Wenbin បានបញ្ជាក់ថា បរិយាកាសក្នុងព្រឹត្តិការណ៍មានភាពរស់រវើក សប្បាយរីករាយ និងសុខដុមរមនា ដែលបានបង្ហាញពីភាពទាក់ទាញពិសេសរបស់កម្ពុជាក្នុងនាមជា «ព្រះរាជាណាចក្រអច្ឆរិយៈ»។ លោកបានបន្ថែមថា ព្រឹត្តិការណ៍នេះបានលើកកម្ពស់ឥទ្ធិពលអន្តរជាតិរបស់ម៉ារ៉ាតុងអន្តរជាតិចក្រភពអង្គរ ព្រមទាំងរួមចំណែកជំរុញទេសចរណ៍កីឡា និងការផ្លាស់ប្តូរអន្តរជាតិនៅកម្ពុជា។